МАРҒҰЛАН УНИВЕРСИТЕТІНІҢ ГИМНАСТШЫЛАРЫ ХАЛЫҚАРАЛЫҚ ТУРНИРДЕ ҚОЛА МЕДАЛЬДАРҒА ИЕ БОЛДЫ

14.09.2023

Ресей Федерациясының Великий Новгород қаласында спорттық акробатикадан КСРО-ның еңбек сіңірген спорт шебері Юрий Золотовты еске алуға арналған халықаралық турнир аяқталды. Үш күн бойы Қазақстан, Ресей, Беларусь, Армения және Өзбекстаннан келген 300-ге жуық мықты спортшылар жеңіс үшін барын салды.

Жарыстың ұйымдастырушылары – Ресейдің спорттық акробатика федерациясы мен Ресей Федерациясының спорт министрлігі. Турнир әр түрлі жас санаттары бойынша акробатиканың бес түрі бойынша өтті: аралас жұптар, ерлер жұптары, әйелдер жұптары, әйелдер тобы және ерлер тобы.

Сайыс қорытындысы бойынша Марғұлан университеті ДШжС-34 тобының студенті Руслан Аубакиров пен ДШжС-22 тобының студенті Аяжан Ещанова қола медальдарға ие болды.

Аяжан спорттық акробатикадан еңбек сіңірген жаттықтырушы Татьяна Михайловна Коваленконың шәкірті болса, Русланды спорттық акробатикадан бірінші санатты ұстаз Светлана Юрьевна Аубакирова дайындайды.