МАРҒҰЛАН УНИВЕРСИТЕТІНІҢ ЕРІКТІЛЕРІ АРДАГЕРЛЕРГЕ КӨМЕКТЕСУДЕ

Марғұлан Университетінің «Лотос» еріктілер ұйымының белсенділері бүгін оқу орнының ардагерлеріне барып, олардың үй шаруасына көмектесті.

Университетіміздің Шағыман Дана, Әлім Ерболат, Хамитбеков Тілеу, Ақайдар Гүлсезім сынды студенттер ардагер Қизат Нұрғұмарқызының шаңырағында болды. Қизат апаймен бірге пәтерді ретке келтіріп, әңгімелесіп, жақсы көңіл-күй сыйлады.

«Қизат апайдың үй шаруасына көмектесіп, жақсы көңіл-күй сыйлағанымызға өте қуаныштымын. Үлкендерге барып, көмектескенді жақсы көремін. Қизат апай да риза болып, алғысын айтты», – дейді Дана Шағыман.

Жастар үлкен кісілердің естеліктерін, баға жетпес ақыл-кеңестерін тыңдағандарына дән риза екендіктерін жеткізді. Қизат апаймен бірге домбыра тартып, жас кезіндегі әндерін шырқады.

Бүгін 5 желтоқсан – Халықаралық еріктілер күні. Марғұлан Университетінің студенттері арасында қамқор жандар аз емес. Марғұлан Университетінің «LOTOS» еріктілер ұйымы 2018 жылы құрылған. Бүгінде оның қатарында 100-ден астам студент бар, олар әрқашан мұқтаж жандарға көмектесуге дайын. Олар қайырымдылық шараларды, концерттерді жиі өткізеді.