МАРҒҰЛАН УНИВЕРСИТЕТІНІҢ 7 СТУДЕНТІ ШЕТЕЛДЕ БІЛІМ ЖЕТІЛДІРУДЕ

24.11.2023

2023-2024 оқу жылының күзгі семестрінде университетіміздің 7 студенті академиялық ұтқырлық бағдарламасы бойынша шетелге оқуға барды. Грант жеңіп алған студенттер - Абдимуталов Анармат, Алпамыс Маджида, Ардабаев Адылхан, Жанатова Аружан, Қанатбекұлы Арнұр, Сағындық Еділ және президенттік стипендия иегері Тоқтарова Аида. Олар «Шетел тілі: екі шет тілі», «Тарих», «Математика – физика» мамандықтарының 2, 3, 4 курстарында оқиды. Олар Венгрияның Шопрон университетіне, Түркияның Токат Газиосманпаша университетіне, Чанаккале Онсекиз Март университетіне, Стамбул Айдын университетіне барды.

Жақында Марғұлан университетінің ректоры Жанбол Жилбаев бастаған делегация Түркияға барған іс-сапары барысында сонда оқып жатқан студенттермен де жүздесіп, жағдайларымен танысып қайтқан болатын. Солардың бірі - «Тарих» білім беру бағдарламасының студенті Арнұр Қанатбекұлы. Түркияның Токат Газиосманпаша университетінде білімін жетілдіруде. Студент шетелден көрген білгені мен алған әсерін бізбен де бөлісті. Жерлесіміздің айтуынша, ол жақта адамдар білім алу үшін жасына қарамайды. Яғни, жасы келген үлкен адамдар да білім алуға құштар екен дейді ол.
- Токат Газиосманпаша университетінің басшылығы оқуға керек-жарағымыз бен жататын орнымызды толықтай қамтамасыз етіп, барынша көмек көрсетті. Бұл жақтан үйренеріміз көп екен. Мені таң қалдырғаны бір жайт бар. Ол білім алу адамның жасымен өлшенбейді, яғни ешқашан да кеш емес. Оған дәлел – тобымызда жастары  30-дан, 40-тан асқан студенттер бакалавр деңгейінде білім алып жатыр, - дейді Арнұр Қанатбекұлы.

Президент стипендиясының иегері Аида Тоқтарованың сөзінше, Шопрон университеті Австрия шекарасына жақын жерде, Венгрияның «ең қонақжай қаласында» орналасқан. Онда орман шаруашылығы, ағаш технологиясы, педагогика және экономика салаларында мамандандырылған төрт факультетте өте сапалы білім береді.

-Университет академиялық ұтқырлық бағдарламасы бойынша бір семестрге оқуға мүмкіндік берді. Біздің студенттерге бұл жерде оқу өте ұнады. Себебі студенттер басқа этностар мен мәдениет өкілдерімен қарым-қатынасқа түсіп, ағылшын тілін үйреніп жатыр. Жалпы болашақ шет тілі мұғалімдеріне шетелдіктерден тәжірибе алу өте маңызды. Өйткені, тілді үйрену тек грамматиканы зерттеу ғана емес, сонымен қатар, сол елдердің менталитетін, мәдениеті мен дәстүрлерін де түсіну керек, - дейді Аида Тоқтарова.

Осы ретте шетелде білім алуға мүмкіндік алған студенттер Марғұлан университетінің басшылығына және Токат Газиосманпаша университетінің ұжымына өз алғыстарын білдірді.