МАРҒҰЛАН УНИВЕРСИТЕТІНЕ АҚШ-ТАН ОҚЫТУШЫ КЕЛДІ

07.09.2023

Әлкей Марғұлан атындағы Павлодар педагогикалық университетінің магистранттарына және студенттеріне АҚШ-тан келген оқытушы дәріс береді. Атап айтқанда ағылшын тілі мұғалімі Гада Рахман бір жылдық келісім бойынша келіп, 2023-2024 оқу жылында біздің студенттерге «Шет тілі: екі шет тілі» пәні бойынша сабақ беретін болады.

Бүгін Марғұлан университетінің басқарма төрағасы-ректор Жанбол Жилбаев АҚШ Елшілігінің өкілі Әсият Сүлейменовамен және АҚШ-тан келген ағылшын тілінің оқытушысы, English Language Fellow бағдарламасының қатысушысы Гада Рахманмен (Ghadah Rahman) кездесті. Кездесудің мақсаты – шетелден келген ағылшын тілі оқытушысымен танысу және шетелдік оқытушының біздің университет үшін ұсынған бағдарламасын имплементациялауды талқылау болды. Сонымен қатар, университет басшысы үлкен тәуекелге бел буып, біздің елді, соның ішінде Марғұлан университетін таңдап келген шетелдік оқытушыға алдағы бір жылда сәттілік тілеп, алғысын білдірді.

Марғұлан университетінің «Шет тілі: екі шет тілі» білім беру бағдарламасының жетекшісі Әлия Жолдыбаеваның айтуынша американдық маман Гада Рахман халықаралық English Language Fellow бағдарламасы бойынша келген. Ол бір жыл біздің университетте сабақ беріп қана қоймай, өзі де қазақ тілін үйренгісі келетінін жасырмады.