Перейти к содержимому страницы.
    1. Басты
    2. Жаңалықтар
    3. МАРҒҰЛАН УНИВЕРСИТЕТІНДЕ XV РЕСПУБЛИКАЛЫҚ ПӘНДІК ОЛИМПИАДА БАСТАЛДЫ

МАРҒҰЛАН УНИВЕРСИТЕТІНДЕ XV РЕСПУБЛИКАЛЫҚ ПӘНДІК ОЛИМПИАДА БАСТАЛДЫ

19.04.2023

Бүгін Ә.Марғұлан атындағы Павлодар педагогикалық университетінде жоғары оқу орын студенттері арасында дене шынықтыру және спорт бойынша XV республикалық пәндік олимпиада басталды. Олимпиаданың ашылу салтанатына Марғұлан университетінің ректоры Жанбол Жилбаев қатысып, қатысушыларға сәттілік тіледі.

-Олимпиадаға өз университеттерінде іріктеуден өтіп, ең үздік шыққан студенттер келіп отыр. Сіздер өз оқу орындарыңыз  үшін қазірдің өзінде жеңімпазсыздар. Баршаңызға сәттілік пен жеңіс тілеймін, - деді Жанбол Октябрьұлы.

Өнер және спорт жоғары мектебінің деканы Валентина Лебедеваның айтуынша, пәндік олимпиаданың мақсаты – дене шынықтыру пәні мұғалімдерін сапалы түрде даярлау, білім беру бағдарламалары тобындағы үздік студенттерді анықтау.

-Олимпиада – бұл жарыс қана емес, достар мен пікірлестердің кездесуі. Біз қонақтарымыз үшін қызықты бағдарлама дайындадық, қаланың көрікті орындарына экскурсия ұйымдастырылады, - деді Валентина Лебедева.

Олимпиада бағдарламасы үш кезеңнен тұрады. Ол - интеллектуалдық тур, ғылыми жоба және қимыл-қозғалыс құзыреттілігі. Олимпиадаға Қазақстанның түкпір-түкпірінен 14 жоғары оқу орнының өкілдері келді. Білім бәсекесі үш күнге жалғасады.

Теориялық білім деңгейін анықтауға арналған «Интеллектуалды» туры компьютерлік тестілеу түрінде өтеді. Әрбір студент үшін компьютерлік бағдарлама 30 тест тапсырмасын ұсынады, оған 45 минут уақыт беріледі.  «Ғылыми жоба» атты екінші турда командалар «Білім беру кеңістігіндегі дене шынықтыру және спорт: инновациялар және даму перспективалары» тақырыбындағы ғылыми жобаларының нәтижелерімен таныстырады.  «Қимыл-қозғалыс құзыреттілігі» туры мектеп бағдарламасының негізгі спорт түрлерінен жаттығуларды орындауды қамтиды. Қатысушылар баскетбол, волейбол және акробатика бойынша практикалық дағдыларын көрсетеді. 
Олимпиада қатысушыларына арналған мерекелік концертте Өнер және спорт жоғары мектебінің студенттері әсерлі акробатикалық қойылым көрсетті. Ал №7 арнайы мектеп-интернаттағы достарымыз әдемі спорттық билерімен көрермендерді баурап алды. Барлық қатысушыларға сәттілік тілейміз!