МАРҒҰЛАН УНИВЕРСИТЕТІНДЕ АҚЫН СЕРІК ҚҰСАНБАЕВТЫҢ МЕРЕЙТОЙЫ ӨТТІ

12.10.2023

Ә.Марғұлан атындағы Павлодар педагогикалық университетінде  айтыскер  ақын, ҚР мәдениет қайраткері, Қазақстан журналистер одағының мүшесі Серік Құсанбаевтың 60 жас мерейтойына арналған конференция өтті. Ресми шара басталмас бұрын қадірменді меймандарды университет басшысы жеке қабылдап, Марғұлан университетінің 60 жылдық мерейтойлық медалін табыстады.

Конференция шымылдығын Марғұлан университетінің ректоры Жанбол Жилбаев өзінің құттықтау сөзімен ашып, айтыскер ақын Серік Сәдуақасұлының шығармашылығына толағай табыстар тіледі. Сонымен қатар, Ертіс-Баян өңірінің ұстаздар ордасына ат басып бұрып келген қонақтарға алғысын білдірді. Жиынға ҚР Парламенті Мәжілісінің депутаты, айтыскер ақын Аманжол Әлтаев, елімізге белгілі айтыс ақындары Қойлыбай Асанов, Серікзат Дүйсенғазы, Даулеткерей Қапұлы және облыстық мәдениет, тілдерді дамыту және архив ісі басқармасының басшысы Медет Тауысқан қатысты. 

Ақынның мерейтойына арналған конференцияны Аманжол Әлтаев жүргізіп, мерейтой иесінің шығармашылық жолындағы және ел мәдениеті мен руханиятын дамытудағы еселі еңбегінен сыр шертті.

-Айтыс қазақ халқының ұлттық бренді. Ел тәуелсіздігін енді алып, еңсе көтере бастаған жылдар ұлт тарихы үшін сыңдарлы кезең болатын. Тәуелсіз елдің іргесін енді бекемдеп елең-алаң күй кешкен халық санасына ұлттық идеология аса қажет болып тұрған шақ еді. Қоғамда орын алған өзекті проблемалар Серік ақынның жырларында толықтай көрініс тауып отырды, басын бәйгеге тігіп шыңдықты жырлады,- деді А.Бөкетов атындағы университеттің профессоры Қойлыбай Асанов.

Қонақтар қазақ айтыс өнерінің дүлдүлі, халқына қалаулы жерлесіміз туралы жылы естеліктермен бөлісті. Шараның куәгері болған студенттерге де айтыс оғландарымен кездесу ерекше әсер сыйлады. Талай шәкірт тәрбиелеп, сахна саңлағына айналдырған абадан ақынға Марғұлан университетінің талантты студенттері жырдан шашу шашып, құрмет көрсетті.