МАРҒҰЛАН УНИВЕРСИТЕТІ ЖАТАҚХАНАЛАРЫ СТУДЕНТТЕРДІ ҚАБЫЛДАУДЫ БАСТАДЫ

25.08.2023

Әлкей Марғұлан атындағы Павлодар педагогикалық университеті биыл 1300-ден астам баланы жатақханамен қамтамасыз етпек. Универстет ауласындағы №1 және №2 студенттер үйі білім алушы жастарды қабылдауды бастады. Сонымен қатар, осы жылы студенттерді жатақханамен толық қамтамасыз ету үшін университет "Павлодартурист" ЖШС-мен ("Сары-Арқа" қонақ үйі) 100 төсек-орынға және "Сократ-ПВ" ЖШС жатақханасымен (Целиная көшесі, 46) 500 төсек-орынға меморандумдар жасасты.

Марғұлан университетінің жаңа жатақханасы аталатын №2 студенттер үйінде білім алушылардың бос уақыттарын тиімді өткізу үшін қандай мүмкіндіктержасалған? Жатақхана тәрбиешілерімен бірге біз де аралап көрдік. Мұнда жалпы 475 студент қабылданады. Негізінен 1-2 курс студенттері орналастырылады.

Студенттер үйі соңғы үлгіде жабдықталған. Яғни, әр бөлменің өзінің жеке асүйі, дәретханасы және жуынатын бөлмесі бар. Және жастардың бос уақытына арналған әртүрлі демалыс бөлмелері мен алаңдар қарастырылған. Атап айтар болсақ, ғимараттың бірінші қабатында коворкинг орталығы, яғни, жастар алаңы мен үстел ойындары кабинеті орналасқан. Коворкинг орталығында түрлі тақырыпта жиналыстар, кеңестер және басқа да шаралар үйымдастырылады. Сонымен қатар, студенттердің денсаулығын әрдайым бақылап тұратын медициналық пункт және изолятор бөлмесі жұмыс істейді. Екінші қабатта психолог кабинеті жастарға писхологиялық кеңес беру қызметін көрсетеді. Ал үшінші қабаттағы демалыс алаңында кинотеатр,төртінші қабатта компьютерлік бөлме, бесінші қабатта шығармашыл жастар үшін дайындық залы бар. Онда студенттер биге, спектаклге, концертке және басқа да жарыстар мен шараларға дайындалады. Әр демалыс бөлмесі түнгі сағат 22.00-ге дейін ашық болады. Студенттер үйінің жертөле қабатында киім жуатын және үтіктейтін орындар бар. Сонымен қоса, үстел теннисі мен жаттығу залдары арнайы құрылғылармен толық жабдықталған.

Марғұлан университетінің №1 студенттер үйінде 300-ден астам студентке арналған орын бар. Ескі жатақхана ғимаратында кітапхана, хореографиялық зал, компьютерлік бөлме және ауласында бірнеше спорттық алаңдар орналасқан.

Біздің университетте талантты жастардыңталабын ұштауға, сапалы білім алып, білікті маман болып шығуына барлық жағдай жасалған. Ендеше, Ертіс-Баян өңірінің ең үлкен ұстаздар ордасына жаңа түскен жастардың білім жолына сәттілік тілейміз!