МАРҒҰЛАН УНИВЕРСИТЕТІ ӨКІЛДЕРІ НАЗАРБАЕВ УНИВЕРСИТЕТІНІҢ АКАДЕМИЯЛЫҚ ТӘЖІРИБЕСІМЕН ТАНЫСТЫ

03.06.2024

 Астана қаласында орналасқан Назарбаев университетінде (NU) PhD бағдарламаларды басқару және дамыту саласындағы академиялық біліктілік деңгейін арттыруға бағытталған «PhD Insights: NU-дың академиялық тәжірибесімен бөлісуі» атты семинар өтті. Шараны NU және Қазақстан Республикасы Ғылым және жоғары білім министрлігіне қарасты Ғылым және жоғары білім саласындағы сапаны қамтамасыз ету комитетімен бірлесіп ұйымдастырды.

Аталған шараға Марғұлан университетінің академиялық мәселелер жөніндегі департамент директоры Жакиенова Алия Амангелдіқызы, зерттеулерді қолдау жөніндегі департаменті коммерциялау бөлімінің маманы Гаврилова Татьяна Владимировна және гуманитарлық ғылымдар жоғары мектебінің қауымдастырылған профессоры, PhD Садыкова Айгүл Маратқызы қатысты. Қазақстан өңірлеріндегі 30 жоғары оқу орнының өкілдері қатысқан бұл семинарда PhD бағдарламаларын басқару, зерттеу жұмыстары бойынша ұсыныстар дайындау және кәсіби тұрғыдан даму бағытында NU тәжірибесі талқыланды. Тыңдаушылар пікірталастарға, практикалық сабақтарға қатысып, тәжірибе алмасты. Семинар барысында ұйымдастырылған жұмыс нәтижесі бойынша қатысушылар сертификаттарға ие болды.