MARGULAN UNIVERSITY ДЕЛЕГАЦИЯСЫ АЛТАЙ МЕМЛЕКЕТТІК ПЕДАГОГИКАЛЫҚ УНИВЕРСИТЕТІНДЕ БОЛДЫ

18.04.2023

Ә.Марғұлан атындағы Павлодар педагогикалық университетінің ғылыми жұмыстар жөніндегі проректоры Бауыржан Есенгелдин бастаған делегация Ресей Федерациясының Барнаул қаласындағы Алтай мемлекеттік педагогикалық университетіне барды. Қонақтарды АлтМПУ-дың білім беру ісі жөніндегі проректоры Сергей Волохов пен халықаралық бөлімінің бастығы Алексей Гайворонский қарсы алды.

Алдымен ЖОО басшылығымен кездесу болды. Онда ғылыми қызметтегі ынтымақтастықтың келешегі, академиялық ұтқырлық аясында оқытушылар мен студенттердің тәжірибе алмасуы және серіктестікті дамытудың басқа да мәселелері талқыланды. Іс-cапар бағдарламасы өте қызықты болды. Әріптестер Алтай университетінің өлкетану мұражайына және «Кванториум» атты педагогикалық технопаркіне экскурсия жасап, жақсы жағымды әсер алды. Марғұлан университеті делегацияның тағы бір негізгі мақсаты – осыдан 10 жыл бұрын АлтМПУ жанынан ашылған «Қазақ тілі мен мәдениеті орталығының» бүгінгі жұмысымен танысу болды. Айта кету керек, аталған орталық Марғұлан университеті басшылығының бастамасымен іске қосылған болатын. Павлодарлықтарды Алтай аймағы қазақтары ұлттық мәдени автономиясының төрағасы Мұрат Бекмұратов пен Қазақ тілі мен мәдениеті орталығының меңгерушісі Аида Бексұлтанова қарсы алды. Алтайлық қандастарымыз ұйымның 10 жыл ішінде атқарған жұмыстары мен жеткен жетістіктері туралы айтты. Марғұлан университетінің өкілдері АлтМПУ-де оқитын қазақ студенттерімен кездесіп, біздің университетке түсу ережелері, Қазақстан Республикасының азаматы болып табылмайтын қазақтарды оқытуға арналған стипендиялық бағдарлама туралы айтып берді.