Перейти к содержимому страницы.

МАРҒҰЛАН УНИВЕРСИТЕТІ МЕН «ALTYNSARIN ACADEMY» МЕМОРАНДУМҒА ҚОЛ ҚОЙДЫ

28.11.2025

2025 жылдың 28 қарашасында Марғұлан университеті мен «Altynsarin Academy» қоғамдық білім беру қоры өзара ынтымақтастық туралы меморандумға қол қойды. Құжатқа қол қою рәсімі «Mugalim Pavlodar» жобасының кезекті семинары барысында ұйымдастырылды. Ынтымақтастық студенттердің кәсіби дамуын қолдауға, болашақ педагогтардың әлеуетін арттыруға және білім беру саласындағы бірлескен бастамаларды жүйелі түрде жүзеге асыруға бағытталған.

Марғұлан университетінің ректоры Ержан Әмірбекұлы меморандумның жоғары маңызын атап өтті:
– «Altynsarin Academy» қорымен серіктестік студенттік ортаның дамуына жаңа серпін береді. Бұл келісім білім беру тәжірибелерін кеңейтіп, студенттердің көшбасшылық қабілеттерін нығайтуға және педагог кадрларды даярлаудың сапасын арттыруға мүмкіндік ашады, – деді ол.

Серіктестік шеңберінде университеттің «Шамшырақ» көшбасшылар академиясы негізгі бастамалар орталығына айналады. Академия қабырғасында студенттердің зияткерлік дамуы, көшбасшылық қасиеттері мен сыни ойлау дағдылары қалыптасады. Мұнда жастар саналы шешім қабылдауды, өз ойын дәл әрі сауатты жеткізуді және қоғам үшін пайдалы тұлға болуды үйренеді.

«Altynsarin Academy» директоры Әділхан Жастлекұлы жобаның мәні мен алдағы жоспарларын былайша жеткізді:
– Жобамыздың маңыздылығы – құндылыққа негізделген ұстазды дайындау. Университеттің ‘Шамшырақ’ академиясымен әріптестігі аясында студенттер ай сайын семинарларымызға қатыса алады, бірлескен іс-шаралар ұйымдастырылады. Біздің басты мақсатымыз – оқу, даму және болашақ ұстазды жан-жақты қалыптастыру, – деді ол.

Меморандумға қол қойылғаннан кейін өткен «Mugalim Pavlodar» семинары студенттер, оқытушылар және білім беру қоры өкілдерінің тәжірибе алмасуына мүмкіндік беріп, жаңа бастамалардың бастауына айналды.