МАРҒҰЛАН УНИВЕРСИТЕТІНЕ РАФИҚА НҰРТАЗИНАНЫҢ ҰРПАҚТАРЫ КЕЛДІ

04.05.2023

Ә.Марғұлан атындағы Павлодар педагогикалық университетіне филология ғылымдарының докторы, профессор, ЖМ ХҒА академигі, Ғылыми-сараптамалық кеңесінің мүшесі Элеонора Дүйсенқызы Сүлейменова, дәрігер Гүлнұр Дүйсенқызы, ұстаз Баян Дүйсенқызы, Павлодар Ертіс өңірінің белгілі өлкетанушысыі Дудан Ысқақовалар келді. Бұл кісілер елімізге белгілі педагог, ғалым Рафиқа Нұртазинаның ұрпақтары. Құрметті қонақтарды университет ректоры Жанбол Жилбаев, ғылыми жұмыс жөніндегі проректор Бауыржан Есенгелдин, филология ғылымдарының докторы, профессор Зифа Теміргазиналар қарсы алды.
Ректор Жанбол Октябрьұлы Марғұлан университетінде өткен жылдан бері орын алған жаңашылдықтарға тоқталып, студенттерге сапалы білім беру бағытында атқарылып жатқан жұмыстармен таныстырды. Сонымен қатар, ұстаздар ордасына арнайы уақыттарын бөліп келген құрметті меймандарға алғысын білдіріп, университет тарихы туралы шығарылған кітапты сыйға тартты.

Элеонора Дүйсенқызы Рафиқа Нұртазинаның мұрасын зерттеу және насихаттау бойынша жүргізіліп жатқан жұмыстарға тоқталды. Ол талантты ұстаздың шығармашылығы туралы диссертация жазып жүрген жас зерттеуші Динара Дүйсенованы таныстырды. Сондай-ақ, Павлодар педагогикалық университетіне өзінің жаңа кітаптарын сыйға тартты. Олардың ішінде белгілі қазақстандық педагог-новатор, филолог, қоғам қайраткері Рафиқа Нұртазинаның өмірі мен шығармашылығына арналған мақалалар мен очерктер бар.

Осы күні ғалымның ұрпақтарымен «Орыс тілі мен әдебиеті» білім беру бағдарламасының оқытушылары мен студенттері де кездесіп, еркін әңгіме болды. Кездесу Рафика Нұртазина атындағы кабинетте өтті. Студенттер өздерін қызықтырған сұрақтарын қойып, алған әсерлерімен бөлісіп, жақсы әсерлі диалог орнады. Оқу орнындағы кездесулерден кейін университет ауласында ағаш отырғызу рәсіміне қатысып, естелік суреттерге түсті. Содан кейін университет басшылығына және басқарма мүшелеріне осындай жылы шыраймен қарсы алып, құрмет көрсеткені үшін алғыстарын білдірді.