Margulan Centre қызметкері Еңлік Абеуова «ТМД-ның Үздік жас ғалымы» атанды!

12.11.2021

Павлодар педагогикалық университетінің Margulan Centre «Рухани жаңғыру» ғылыми-зерттеу зертханасының меңгерушісі Абеуова Еңлік Қабыкенқызы ТМД ғылыми – білім беру мекемелері арасында ғылым мен білімді дамытуға қосқан үлесі үшін «Үздік жас ғалым-2021» төсбелгісімен және «Үздік жас ғалым-2021» халықаралық жобасының II дәрежелі Дипломымен марапатталды.

Еңлік Абеуова Павлодар облысының қасиетті нысандарын зерттегені үшін аталған мәртебеге ие болды. Ғылыми жұмыс ең үздік деп танылып, «ТМД елдерінің IV Халықаралық кітап басылымы «Үздік жас ғалым – 2021» атты ISBN халықаралық коды берілген ғылыми мақалалар жинағында жарияланды.

Жобаның негізгі мақсаты жас ғалымдардың неғұрлым маңызды инновациялық жобаларын анықтау, ғылыми мүдделерін ілгерілету, ТМД елдерінде ғылымды дамыту үшін біріктіруші платформа құру болып табылады. Байқауды «Бөбек» Жалпыұлттық қозғалысы» қауымдастық нысанындағы заңды тұлғалар бірлестігінің қолдауымен Халықаралық жас ғалымдар қауымдастығы (Қазақстан, Нұр-сұлтан) ұйымдастырды.

Бұл жобаға халықаралық ынтымақтастық және ғылымды одан әрі интеграциялау шеңберінде Қазақстан, Ресей, Өзбекістан және Қырғызстаннан келген түрлі тақырыптағы ғылыми зерттеулерге әуес жас әрі талантты адамдар қатысты.

Margulan Centre қызметкерінің осындай жоғары деңгейдегі лайықты жеңісі - бұл жоғары оқу орнының жас таланттарының жоғары білімдерінің, олардың табандылығының, жаңа жаңалықтар мен білімге ұмтылысының жарқын көрсеткіші.