МАРҒҰЛАН УНИВЕРСИТЕТІНДЕ Л.ГУМИЛЕВ УНИВЕРСИТЕТІНІҢ ПРОФЕССОРЫ ДӘРІС ОҚЫДЫ

Ә.Марғұлан атындағы Павлодар педагогикалық университетіне Л.Гумилев атындағы Еуразия ұлттық университетінің профессоры, филология ғылымдарының докторы Жұмағұл Сағымбай Ботпайұлы келіп, студенттерге дәріс жүргізді. Шара академиялық ұтқырлық бағдарламасы бойынша ұйымдастырылды.

Л.Гумилев атындағы Еуразия ұлттық университетінің профессоры 20 ақпаннан бастап, 20 наурызға дейін «Қазақ тілі мен әдебиеті» білім беру бағдарламасының студенттеріне дәріс оқыды. Елордалық профессордың сабағына ҚТӘ-21,23,25,27,29 топтарының студенттері қатысып, өздерінің мамандықтары бойынша мол мағлұмат алды. Онлайн және офлайн форматта өткен дәрісте студенттер өздерін қызықтырған сұрақтарын қойып, тұщымды жауап алды деуге болады.

- Сағымбай Ботпайұлы қазақ әдебиеті тарихын көп зерттеген ғалым. ХІХ ғасырдың аяғы мен ХХ ғасырдың басындағы қазақ әдебиеті төңірегінде құнды деректермен, қызықты фактілермен, маңызды мәліметтермен бөлісті. Әсіресе, өнер тұтастығы мазмұндағы ақындар поэзиясы, ағартушылық - демократиялық мазмұндағы реалистік жаңа жазба әдебиет т.б. тақырыптар дәрістің өзегіне айналды, - дейді «Қазақ тілі мен әдебиеті» ББ жетекшісі Майгүл Еренғайыпқызы.

Ұлыстың ұлы күні – Наурыз мерекесі қарсаңында аяқталған дәрістің соңғы қорытынды жиыны Е.Бекмаханов атындағы ғылыми кітапханада өтті. Шараға Марғұлан университетінің стратегиялық даму және интернационалдандыру жөніндегі проректоры Бауыржан Әбуов, "Қазақ тілі мен әдебиеті" ББ жетекшісі Майгүл Еренғайыпқызы қатысып, профессорға алғысын білдірді.

Сағымбай Ботпайұлы өз кезегінде университет кітапханасына өзінің сүбелі еңбектерін табыс етті.