МАРҒҰЛАН УНИВЕРСИТЕТІНІҢ РЕКТОРЫ МЕКТЕП ҰЖЫМЫМЕН КЕЗДЕСТІ

07.02.2023

Әлкей Марғұлан атындағы Павлодар педагогикалық университеті өңіріміздегі жалпы орта білім беру мектептерінің барлығымен тығыз байланысты жұмыс жүргізіп келеді. Бүгін университеттің басқарма төрағасы-ректор Жанбол Жилбаев Павлодар қаласындағы Әлихан Бөкейханов атындағы лицей-мектебіне барып, ұжыммен кездесу өткізді. Мақсаты – студенттердің педагогикалық тәжірибеден өту орнымен танысу, студенттер туралы жетекшілердің пікірін тыңдау және туындайтын кейбір мәселелердің алдын алу.

Кездесу барысында университет пен мектеп арасындағы әріптестік, іскерлік байланысты арттыру мақсатында бірқатар ұсыныстар айтылды. Мысалы, мектеп мұғалімдері жоғары оқу орнының студенттеріне сабақ өткізу және университеттің профессорлық-оқытушылық құрамы мектеп мұғалімдері үшін семинарлар өткізу мәселесі көтерілді.

Әлихан Бөкейханов атындағы лицей-мектебінің директоры Ләйла Бажқызының сөзінше, алдағы уақытта мектеп жанынан жоғары оқу орны зертханасын ашуды жоспарлап отыр. Міне, осы жоспарға байланысты университеттен қолдау күтетінін айтты. Марғұлан университетінің басшылығы да білім саласын көтеруге бағытталған әрбір іскерлік-әріптестік ұсыныстарды бірауыздан қолдап, бірлесіп жұмыс атқаруға дайын екенін білдірді.

- Біз Әлкей Марғұлан атындағы Павлодар педагогикалық университетімен бірлесіп жұмыс жасауға әрқашан дайынбыз. Алдағы уақытта ынтымақтастығымыз арта береді деп сенемін. Біздің мектепте Марғұлан университетін өткен жылы бітірген төрт жас мұғалім жұмыс істейді. Олардың екеуі университетті үздік бітірген түлектер. Барлығы өз жұмыстарына тиянақты қарайтын және өз мамандықтарына шынайы берілген білімді де білікті жастар. Міне, осындай маман тәрбиелеп отырған университет ұжымына алғыс білдіремін, - деді мектеп директоры Ләйла Бажқызы.

Айта кету керек, аталған мектеп директоры Ләйла Бажқызы да Марғұлан университетінің түлегі. Сондықтан, университет ректоры 60 жылдық мерекелік медальмен марапаттап, біздің студенттерге жасаған қамқорлығы үшін алғысын білдірді.