М.ҚАНАПИЯНОВ АТЫНДАҒЫ ЖОҒАРЫ КОЛЛЕДЖ ҰЖЫМЫ МАРАПАТТАЛДЫ

13.12.2022

Ә.Марғұлан атындағы Павлодар педагогикалық университетінің дамуы жолында М.Қанапиянов атындағы жоғары колледжінің қосып жатқан үлесі орасан зор. Колледж ұстаздары мен студенттері облыстық, республикалық, халықаралық деңгейдегі спорт және білім додаларында топ жарып, облыстың ғана емес еліміздің атын шығарып келеді. Бүгін университеттің басқарма төрағасы-ректор Жанбол Жилбаев колледждің дарынды да талантты студенттерімен және еңбекқор ұстаздарымен кездесіп, жемісті еңбектері үшін алғыс білдірді. Кездесуге бокстан әлем чемпионатының жүлдегері, университеттің түлегі Серік Теміржанов қатысты.

- Биыл біздің университет ұжымы үшін ерекше жыл болды. Атап айтар болсақ, оқу орынның 60 жылдығын атап өттік. Қараша айында Үкіметтің қаулысы бойыша көрнекті ғалым, Академик Әлкей Марғұланның есімі берілді. Биыл М.Қанапиянов атындағы колледж ұстаздары мен студенттері үшін де жетістікке толы жыл болды. Сондықтан, баршаңызға зор алғыс білдіремін. Қазіргі таңда біздің университеттің түлектері де ел намысын абыроймен қорғап жүр. Солардың бірі – Серік Теміржанов, бүгін бізде қонақта. Серікке алдағы уақытта да биік белестерді бағындырып, әлем чемпионы болуға тілектеспіз, - деді Жанбол Октябрьұлы.

Кездесу барысында университет түлегі Серік Теміржанов Ә.Марғұлан атындағы Павлодар педагогикалық университетінің 60 жылдық мерейтойлық медалімен және ректордың Құрмет грамотасымен марапатталды.

- Өзім білім алған сүйікті оқу орыным – Павлодар педагогикалық университеттің барша ұжымын биылғы 60 жылдық мерейтоймен құттықтаймын. Еңбектеріңіз жемісті болсын. Студенттер мен ұстаздарға толағай табыс тілеймін, - деді Серік Теміржанов.
Сонымен қатар, облыс, республика және әлем чемпионаттарында жүлделі орын алған студенттер мен олардың жетекшілері Университеттің басқарма төрағасы-ректоры Жанбол Жилбаевтың Алғыс хатымен марапатталды. Олардың қатарында Испанияда өткен грэпплинг бойынша әлем чемпионатының жүлдегері Имран Мағзум, Тайландта Муай-тайдан өткен әлем чемпионатының қола жүлдегері Санжар Жұмагелді, БАӘ-де пауэрлифтингтен өткен Азия чемпионатының күміс жүлдегері Анжелика Котенёва, Спорттық акробатикадан Азия чемпионы Мария Дорожкина, көкпар және аударыспақ ұлттық спорт түрінен облыс чемпионы Ермек Жұмабаев сияқты үлкен додаларды бағындырған спортшылар бар.