ППУ ректорының Ұлы Жеңіс күнімен құттықтауы

08.05.2021

Қымбатты соғыс және еңбек ардагерлері, тыл еңбеккерлері! Құрметті жерлестер!

Сіздерді Ұлы Жеңістің 76 жылдығымен шын жүректен құттықтаймын! 9 мамыр біз үшін аса маңызды мерекелердің бірі. Бұл күн – бүгінгі ұрпақтың батыр жеңімпаздарға алғыс айту және құрметпен еске алу күні.
Уақыт өткен сайын аға толқын – Сіздердің қол жеткізген ауқымды жетістіктеріңіздің, ірі табыстарыңыздың маңызы артып келеді. Сіздердің көрсеткен ерліктеріңіз, отансүй­гіш­тіктеріңіз, бірліктеріңіз, бауырмалдық және ынтымақтастық қасиеттеріңіз бүгінгі күнге дейін ұрпақтан ұрпаққа жалғасып келе жатқан үлкен құндылық болып табылады. Сондықтан да Сіздерге басымызды иеміз.
Біздің Павлодар педагогикалық университетінен де соғысқа аттанып, қиян-кескі ұрыста ерлік көрсеткен ардагерлеріміз аз емес. Бүгінде ардақты аға буын өкілдеріміз жастарымызға бағыт-бағдар беріп, еңбектен қол үзбей, университетіміздің өркендеуі жолында өз үлестерін қосып келеді.
Жеңіс Күні – қуанышты да қайғылы, баршаға мәртебелі мейрам. Бұл мереке – жанқияр ерліктің, еңселі елдіктің рухы өрлеп, Жеңіс жалауы желбіреген күн. Бүгінгі Тәуелсіздік тұғырының берік, еңсеміздің биік болуы да, еліміздің өркендеуі мен гүлденуі де – осы Ұлы мерекенің жемісі. Қымбатты, ардақты да аяулы ардагерлеріміз бүгінгі Жеңіс күні мерекесі құтты болсын! Сіздердің дендеріңізге саулық, шаңырақтарыңызға шаттық, бақ пен береке тілеймін!<

                                                                                             Құрметпен, Павлодар педагогикалық университетінің

                                                                                                         Басқарма төрағасы – ректор Жанбол Жилбаев