ӘЛИХАН БӨКЕЙХАНОВТЫҢ 155-ЖЫЛДЫҒЫНА АРНАЛҒАН ӘДЕБИ КЕШ ӨТКІЗІЛДІ

04.03.2021

Биыл республикамызда Алаш көсемі, мемлекет және қоғам қайраткері, халқымыздың біртуар перзенті – Әлихан Бөкейхановтың 155 жылдығы атап өтілуде. Алаш Орда үкіметінің төрағасы, ұлт көсемі Әлихан Нұрмұхамедұлының мерейтойы биыл ҚР Тәуелсіздігінің 30 жылдығымен тұспа-тұс келіп отыр. Өзінің бар саналы ғұмырын қазақ халқының ұлт-азаттық қозғалысына, мемлекет біртұтастығы мен тәуелсіздігіне арнаған, ел егемендігі мен халқы үшін жан кешіп күрескен Әлихан бабамыздың есімі ел есінде мәңгілік.

Павлодар педагогикалық университетінде Әлихан Бөкейхановты еске алу шарасы Е.Бекмаханов атындағы кітапхана ұжымының ұйымдастыруымен өтті. Шараға ҚТӘ-15 тобының студенттері қатысты. Аталмыш шара Алаш көсемі туралы шағын видеофильмнен бастау алды. Студенттерге Әлихан Бөкейхановтың өмірі мен шығармашылығы туралы кинохроника көрсетіліп, ұлт көсемі туралы небір қызықты да маңызды деректер айтылды. 1 курс студенті Басыбек Жұматай Әлихан Бөкейхановқа арнау жазып, жұртшылық алдында өлеңін оқыды. Сондай-ақ әдеби кеште Сұлтанмахмұт Торайғыров, Қалқаман Сарин, Қабиден Қожахметтің шығармалары оқылды.

Әдеби кеште Әлихан образы сомдалған театрлық қойылым да көрсетілді. Оған ҚТӘ-15 тобының 1 курс студенттері: Ахмолдина Алина, Құмархан Қасиет, Шырынбек Шерхан, Бахтынова Арай, Турдыгалиева Мақпал, Кемелбек Гүлжанат, Аңсабай Азамат қатысты.

Тарихи-танымдық кеш жастарды патриоттық санада тәрбиелеу, халқымыздың ұлы тұлғаларын кеңінен насихаттауға бағытталған. Іс-шара аясында «Әлихан Бөкейхан – Ұлттық ұлы тұлғасы» атты кітап көрмесі ұйымдастырылып, оған Әлихан Бөкейхановтың өмірі мен шығармашылығы туралы кітаптар, мерзімді басылымдар ұсынылды.