ЖАЗУШЫ ӘУЕЗОВ ӘЛЕМІНЕ САЯХАТ

15.03.2022

Биыл қазақтың көрнекті жазушысы Мұхтар Әуезовтің туғанына 125 жыл толды. Жақында осы мерейтойға орай Е.Бекмаханов атындағы ғылыми кітапхана мен гуманитарлық ғылымдар жоғары мектебінің ұйымдастыруымен әдеби кеш өтті. Оған педагогика ғылымдарының кандидаты, гуманитарлық ғылымдар жоғары мектебінің оқытушы-зерттеушісі Галина Старченко, «Бастауыш оқытудың педагогикасы мен әдістемесі» мамандығының 1 курс студенттері мен мұғалімдері, кітапхана қызметкерлері қатысты.

Әдеби кешке жиналғандар жазушының өмірбаянына қатысты қызықты деректермен, М.Әуезовтің жары Валентина Николаевнаның естеліктерімен танысты. Сонымен қатар, «Әуезов үйіне» виртуалды саяхат жасады. Жас өнерпаздар қазақтың қара домбырасының сүйемелдеуімен Қасым Аманжоловтың, Жұбан Молдағалиевтің өлеңдерін нақышына келтіріп оқыды. Сондай-ақ, Мұхтар Әуезовтің «Абай жолы» романынан үзінділер оқылды. Сол күні барша әдебиет сүйер қауым үшін «Мұхтар Әуезов мұрасы» атты кітап көрмесі дайындалды. Кеш соңында қатысушыларға Алғыс хаттар табыс етілді.