Перейти к содержимому страницы.
    1. Басты
    2. Жаңалықтар
    3. КОЛЛЕДЖДЕР АРАСЫНДА ӨТКЕН ОБЛЫСТЫҚ ПӘНДІК ОЛИМПИАДА

КОЛЛЕДЖДЕР АРАСЫНДА ӨТКЕН ОБЛЫСТЫҚ ПӘНДІК ОЛИМПИАДА

01.12.2023

Әлкей Марғұлан атындағы Павлодар педагогикалық университетінде «Мектепке дейінгі тәрбиелеу және оқыту педагогикасы» білім беру бағдарламасының ұйымдастыруымен колледж студенттеріне арналған облыстық пәндік олимпиада өтті.
 
Сайысқа облысымыздағы колледждерде «Мектепке дейінгі тәрбиелеу және оқыту» мамандығы бойынша оқитын студенттерден құралған 6 команда қатысты. Пәндік олимпиаданың ашылу салтанатында педагогика жоғары мектебі тәрбие-ісі жөніндегі вице-декан Арай Рахымжанова сөз сөйлеп, қатысушыларға сәттілік тіледі.
 
Олимпиада үш кезеңмен өтті. Бірінші кезең - «Тәрбиеші – тәрбие тірегі», командалардың өзін-өзі таныстыруы. Екінші кезең - cахналық қойылым, «Көркем шығармалардағы ұлттық құндылықтардың интеграциясы». Үшінші кезең - «Күш - білімде» деп аталатын теориялық сайыс. Сайыста команда қатысушылары тәрбиеші мамандығының маңыздылығын көрсету, өзін-өзі таныстыру ерекшелігі, сөйлеу мәдениеті, әртістік шеберлігі, музыка және пластикалық мәдениет, қойылымның мағынасын жеткізу, репертуар таңдауының мамандыққа сәйкестігі, сахналық қойылымның шеберлігі (декорация, костюмдер, аудио, бейне жазбалардың сапасы), базалық пәндер бойынша қатысушылардың алған теориялық білім деңгейін анықтау және т.б. талаптар бойынша жан-жақты қабілеттерін сынады.
 
Олимпиада қорытындысы бойынша І орын Жоғары инновациялық көп салалы колледжі жеңіп алды. ІІ орын Б.Ахметов атындағы жоғары педагогикалық колледжіне (қазақ тобы) бұйырды. ІІІ орынды Б.Ахметов атындағы жоғары педагогикалық колледжі (орыс тобы) мен «Жаяу Мұса атындағы Ақсу жоғары көпсалалы колледжі бөлісті.
Павлодар қалалық білім беру бөлімінің әдіскері Құндыз Рахымжанова қазылар алқасының төрайымы ретінде қатысып, жеңімпаздарды марапаттады.

«Креативті топ» номинациясымен М. Қанапиянов атындағы жоғары колледж, «Шығармашыл топ» номинациясымен Екібастұз ИнЕУ жоғары колледжі марапатталды. Олимпиаданың жабылу салтанатында колледж студенттеріне кәсіптік бағдар беру мақсатында филология ғылымдарының кандидаты, профессор Текжанов Қ.М, PhD докторы Каримова Р.М., педагогика ғылымдарының кандидаты, профессор Сарсенбаева Б.Г. сөз сөйледі.

Іс-шара аясында қонақтар үшін экскурсия ұйымдастырылып, олар Әлкей Марғұлан атындағы Павлодар педагогикалық университеті студенттерінің жетістіктерімен және шығармашылығымен танысты.