КӘСІБИ БІЛІМІ БАР МАМАНДАР ПАВЛОДАР ПЕДАГОГИКАЛЫҚ УНИВЕРСИТЕТІНІҢ ҚАЙТА ДАЯРЛАУ КУРСЫНАН ӨТТІ

24.06.2022

Павлодар педагогикалық университеті жанындағы қосымша білім беру институты педагогикалық білім жоқ адамдарды қайта даярлау курстарынан өткізуде. Яғни, кәсіби білімі бар мамандарды тиісті бейіні бойынша қайта оқытып, ҚР Білім және ғылым министрлігінің №110 бұйрығы бойынша арнайы сертификат беріледі.

ППУ қосымша білім беру институтының басшысы Роза Жаеваның сөзінше, курсқа жалпы 1200 сағат яғни, 40 кредит бөлінген. Оның 30-ы оқу бағдарламасына, 10 тәжірибеден өтуге бағытталған.

- Қайта даярлау курсынан Павлодар облысынан және Нұр-Сұлтан қаласынан 12 адам өтті. Сабақ 21 ақпанда басталып, 24 маусымда аяқталды. Тыңдаушыларға педагогика жоғары мектебінің, гуманитарлық жоғары мектебінің, өнер және спорт жоғары мектебінің оқытушылары сабақ өткізді. Білім беру бағдарламасы пәндерінің тізбесі, мазмұны мен көлемі педагогтің кәсіби стандартына, педагогке қойылатын біліктілік талаптарына сәйкес айқындалған, - дейді Роза Райханқызы.

Бүгін курстың барлық тыңдаушылары психологиялық-педагогикалық пәндер бойынша кешенді емтихан түріндегі аттестациядан өтті.