ЖОҒАРЫ БІЛІМ ҚЫЗМЕТКЕРЛЕРІНІҢ КҮНІ АТАЛЫП ӨТІЛДІ

01.10.2024

Бүгін елімізде алғаш рет жоғары білім қызметкерлерінің күні аталып өтілді. Атаулы мерекеге орай Марғұлан университетінде салтанатты шара өтіп, жоғары білім саласында табысты қызмет етіп жүрген қызметкерлерге құрмет көрсетілді.
Шараға Марғұлан университеті ректорының міндетін атқарушы Жанбол Жилбаев қатысып, барша әріптестерін алғашқы аталып отырған төл мерекемен құттықтады.

-1 қазан – өздеріңізге белгілі, Қазақстан Республикасының Жоғары білім қызметкерлері күні болып белгіленді.  Еңбек министрлігінің 2024 жылғы 11 маусымдағы бұйрығымен Кәсіби мерекелердің тізбесіне енді. Осынау игі мерекемен сіздерді шын жүректен құттықтауға рұқсат етіңіздер! Жылда біз ұстаздар күнін ғана мерекелеп, университет қабырғасындағы құрылымдық департаменттер мен бөлімдердің көлеңкеде қалып қалатыны рас. Осы мерекені пайдалана отырып университетіміздің өркендеп дамуына, ұстаздар ордасын талапкерлердің жүрек қалауына айналдырып жүрген жандарға алғысымды білдіргім келеді,- деді университет басшысы.

Жиын барысында университеттің дамуына өзіндік үлес қосып жүрген қызметкерлер түрлі төсбелгілермен, дипломдармен марапатталды. Атап айтқанда «Ғылымды дамытуға сіңірген еңбегі үшін» төсбелгісімен басқарма мүшесі-академиялық мәселелер жөніндегі проректоры Андрющенко Ольга Константиновна марапатталды. «Ана тілін дамытуға қосқан үлесі үшін» төсбелгісі гуманитарлық ғылымдар жоғары мектебінің қауымдастырылған профессоры Әміренов Әділбек Даутбекұлына табысталды.
Гуманитарлық ғылымдар жоғары мектебінің деканы Кәримова Анар «Ахмет Байтұрсынұлы» төсбелгісімен, гуманитарлық ғылымдар жоғары мектебі "Қазақ тілі мен әдебиеті" білім беру бағдарламасының жетекшісі Оразханова Майгуль «Тіл жанашыры» құрмет дипломымен, жаратылыстану жоғары мектебінің қауымдастырылған профессоры Мұхамедиева Қымбатша «Ғылым үздігі» құрмет дипломымен,
«Жоғары және жоғары оқу орнынан кейінгі білім беру iсiнiң үздiгi» құрмет дипломымен өнер және спорт жоғары мектебінің қауымдастырылған профессоры Бронский Евгений Васильевич марапатталды.
Сондай-ақ, тағы бірқатар қызметкерлер Ғылым және жоғары білім министрлігінің Құрмет грамотасымен, Марғұлан университетінің басқарма төрағасы-ректордың құрмет грамотасымен марапатталды.
Шара өнерпаздардың мерекелік концертімен жалғасып, әсем ән, күмбірлі күймен шашу шашылды.