ПАВЛОДАР ПЕДАГОГИКАЛЫҚ УНИВЕРСИТЕТІНДЕ "ІТ JUNIOR" ХАКАТОНЫ ӨТІП ЖАТЫР

09.12.2022

Павлодар педагогикалық университетінің ұйымдастыруымен ХАКАТОН «IT JUNIOR» программалау конкурсы басталғаны мәлім. Конкурстың мақсаты - жастардың бағдарламалық өнімдерін әзірлеуге қызығушылығы мен ынтасын арттыру,  идеяны прототивке дейін жеткізу қабылеттерін дамыту және кәсіпкерлік дағдыларын дамыту. Байқаудың бірінші кезеңі, яғни қатысушылардың өтінімдерін тіркеу рәсімі 7 желтоқсанда аяқталған болса, бүгін екінші кезеңі басталды. Оған Әлкей Марғұлан атындағы Павлодар педагогикалық университетінің ғылыми жұмыстар және халықаралық байланыстар жөніндегі проректоры Бауыржан Есенгелдин қатысып, байқау үміткерлеріне сәттілік тіледі.

- Әлкей Марғұлан атындағы Павлодар педагогикалық университетінің 60 жылдық мерекесіне орай облысымызда көптен күткен Хакатон мерекесі өтіп жатыр. Осы конкурсқа Павлодар облысының мектеп, колледж және жоғары оқу орындарынан көптеген өтінімдер түсті. Солардың ішінен 50-ден астам команданы іріктеп алдық. Олар осы конкурстың басты бәйгесіне таласатын болады. Баршаңызға сәттілік тілеймін,-деді Бауыржан Сатыбалдыұлы.

Екінші кезеңде ІТ кәсіпкер Евгений Фоменконың "Идеядан халықаралық IT-жобаға дейін" атты ашық дәрісі өтіп, онда ол табысты IT-жобаны қалай құруға және жүзеге асыруға болатынын айтып берді. Сонымен қатар, конкурстың талабы бойынша қатысушыларға ІТ жобаларын ұрастыруға қатысты арнайы 10 тапсырма берілді. Қатысушылар сол тақырыптар аясында өздерінің жобаларын берілген уақытқа дейін құрастырып аяқтауы тиіс. Ағымдағы айдың 11-де жобаларды алдын ала көрсету болады.

Конкурстың демеушісі IT-кәсіпкер, бірнеше табысты халықаралық IT-жобалардың негізін қалаушы, PUSH.express, iProxy.online жобаларының авторы Евгений Фоменко. Ол осы жобаға 1,5 млн. теңгеге дейін қаражат бөліп, демеушілік жасап отыр.