ҒЫЛЫМ ОНКҮНДІГІ БАСТАЛДЫ

12.04.2022

Павлодар педагогикалық университетінде  Ғылым саласы қызметкерлері күні мен оқу орынның 60-жылдық мерейтойына орай Ғылым онкүндігі басталды. Аталмыш шара 12-сәуірден 22-сәуірге дейін жалғасады.

Ғылым онкүндігінің ашылуына университеттің ғылыми жұмыс және халықаралық байланыстар жөніндегі проректор, профессор Б.С. Есенгельдин қатысып,оқытушылар мен студенттерді ғылым күнімен құттықтады. Ол өз сөзінде университет ғалымдарының бастамасымен жүргізіліп келген іргелі және қолданбалы зерттеулер туралы айтты. Сондай-ақ ҚР Білім және ғылым министрлігінің ғылыми-зерттеу саласын дамыту саясатын қолдау, сол бағытта атқарылуы тиіс жұмыстар туралы атап өтті.

Ғылым онкүндігі аясында университетте бірқатар ірі шаралар жоспарланған. Мысалы ғалымдардың ғылыми жетістіктерін көрсететін кітап көрмелері, студенттердің ғылыми жобалары ұсынылады. Сонымен қатар, ғылыми мақалалар жазу бойынша ғылыми-практикалық семинарлар, бағдарламалау бойынша шеберлік сыныптар, «Менің студенттен ғалымға дейінгі жолым» жанрында дөңгелек үстелдер мен ғалымдардың дәрістері ұйымдастырылады. Сондай-ақ, студенттердің «Жаңа қоғамдағы жастардың әлеуеті: білім мен ғылымның сапасы» атты студенттік халықаралық ғылыми-практикалық конференциясы ұйымдастырылады. Ғылым онкүндігінің толық бағдарламасымен Павлодар педагогикалық университеті сайтынан таныса аласыздар.