Перейти к содержимому страницы.
    1. Басты
    2. Жаңалықтар
    3. ҒЫЛЫМ ЖӘНЕ ЖОҒАРЫ БІЛІМ МИНИСТРІНІҢ КЕҢЕСШІСІ КЕЛДІ

ҒЫЛЫМ ЖӘНЕ ЖОҒАРЫ БІЛІМ МИНИСТРІНІҢ КЕҢЕСШІСІ КЕЛДІ

02.11.2022

ҒЫЛЫМ ЖӘНЕ ЖОҒАРЫ БІЛІМ МИНИСТРІНІҢ КЕҢЕСШІСІ КЕЛДІ

Павлодар педагогикалық университетіне ҚР Ғылым және жоғары білім министрінің кеңесшісі Таңсәуле Серіков ресми іс-сапармен келді. Құрметті мейманды ППУ басқарма төрағасы-ректор Жанбол Жилбаев қарсы алып, алдымен 60 жылдық тарихы бар педуниверситеттің құрылымымен таныстырды. Содан кейін университеттің профессорлық-оқытушылық құрамымен кездесіп, ерекше қажеттілігі бар азаматтарға білім беру мәселесін талқылады.

-Біз үшін бұл кездесудің маңызы өте зор. Өйткені кездесу тақырыбы да өзекті. Яғни, инклюзивті білім беру мәселесіне және ерекше қажеттіліктері бар студенттер мен қызметкерлер үшін қолайлы орта қалыптастыру тақырыбына арналған. Ал педагогикалық университет үшін бұл екі есе маңызды, өйткені біз психикалық және физикалық проблемалары бар балалармен жұмыс істейтін педагогтарды дайындаймыз. Ағымдағы жылдың 10 қазанында Ғылым және жоғары білім министрі Саясат Нұрбектің университет өкілдерімен инклюзивті білім беру мәселесі бойынша жиналысы өтті. Оған біздің қызметкерлер – Жанар Серікқызы Әбдірахманова және Алмас Қайыргелдіұлы Кенжеғалин қатысты. Кеңес қорытындысы бойынша мүгедектігі бар адамдар үшін жоғары және жоғары оқу орнынан кейінгі білім беру тұжырымдамасын дайындау тапсырылды, - деді Жанбол Октябрьұлы.

Кеңесші өзінің алғашқы жұмыс сапарын біздің университеттен бастағаны бізді қуантты. Оның айтуынша, педагогикалық университеттер инклюзивті білім берудің негізгі флагманы болып табылады. Кездесу барысында инклюзивті білім берудің өзекті мәселелері және университетте білім беру қызметінің қолжетімділігін арттыру тақырыбы талқыланды. Таңсауле Ғабдыманапұлы мүгедектігі бар адамдарға арналған жоғары және жоғары оқу орнынан кейінгі білім беру тұжырымдамасын құрудың бастамашысы болған еді. Кездесу барысында сол тұжырымдаманы ЖОО ұжымына таныстырды.
Тұжырымдаманың мақсаты-жоғары білім беру саласындағы мемлекеттік саясат қағидаттарының сақталуына кепілдік беретін мүгедектігі бар адамдар үшін ғылым мен жоғары білім беруді дамытудың мемлекеттік жүйесін ұйымдастыру: жоғары білімнің жалпыға қол жетімділігін арттыру, білім алушыларды қоғамда табысты әлеуметтенуге дамыту және кейбір ерекшеліктеріне бейімдеу.
Университет оқытушылары мен психологтары қонаққа инклюзивті бағыттағы білім беру бағдарламалары мен ғылыми жобаларын ұсынды. Осыдан соң құрметті қонағымыз бен университет студенттерінің бейресми кездесуі өтті. Таңсәуле Ғабдыманапұлының студенттерді қиындықтан қорықпауға, алға ұмтылуға, қиындықтарды батыл еңсеруге шақырған сөздері ерекше әсер етті.
Себебі, кейбір мүмкіндігі шектеулі азаматтардың үлкен жетістікке жетіп, табысқа кенелуі қоғамдағы кез-келген адамға үлгі-өнеге болатыны анық.