ГЕОГРАФИЯ ПӘНІ БОЙЫНША XV РЕСПУБЛИКАЛЫҚ ОЛИМПИАДА БАСТАЛДЫ

25.04.2023

Margulan University-де ҚР ЖОО студенттері арасындағы география мұғалімдерін дайындау БББ тобы бойынша XV республикалық пәндік олимпиада басталды.

XV республикалық пәндік олимпиадаға Margulan University Басқарма төрағасы-ректор Жанбол Жилбаев қатысып, студенттерге сәттілік тіледі. Ол ашылу салтанатында білім додасының маңыздылығына тоқталып, жарыстың Ертіс-Баян берінде өтіп жатқандығы көңіл қуантатындығын тілге тиек етті.

Ал, өз университеттерінің намысын қорғауға келген студенттер жүректерінде толқыныс барын жасырмады. Дайындық жаман емес, сыннан сүрінбей өтеміз деп ойлаймын. Бұған дейін де бірнеше олимпиадаларға қатыстым,-дейді ОҚМУ 3-курс студенті Ақерке Мұсабекова.

Білім бәйгесі 2 күнге жоспарланған. Бұл жарыста еліміздің 19 ЖОО-нан келген командалар өзара бақ сынамақ. Алғашқы бөлімде қатысушылар теориялық білімдерін тексерсе, екінші кезеңде практикалық бағытта тапсырмалар беріледі,-дейді олимпиада ұйымдастырушысы Мұрабек Омаров.

Жарыс қорытындысы бойынша жекелей сында топ жарған студенттерге естелік сыйлықтар табысталады. Еске салайық, жеңімпаз атанған команда келесі жылғы олимпиаданы ұйымдастыратын болады.