ФЕРҒАНА МЕМЛЕКЕТТІК УНИВЕРСИТЕТІМЕН ЫНТЫМАҚТАСТЫҚ ТУРАЛЫ МЕМОРАНДУМ ЖАСАЛДЫ

19.10.2023

Марғұлан университетінің өкілдері қазақстандық делегацияның құрамында Өзбекстан астанасы – Ташкент қаласында өтіп жатқан «Өзбекстан мен Қазақстан арасындағы жоғары білім, ғылым және инновация саласындағы ынтымақтастық» форумына қатысуда. Іс-шара «InnoWeek.uz-2023» халықаралық инновациялық идеялар апталығы аясында ұйымдастырылды.

Қазақстандық ғалымдардың сапарының басты мақсаты – Өзбекстанның жоғары оқу орындарымен жан-жақты өзара серіктестік орнату.

Форум барысында Әлкей Марғұлан атындағы Павлодар педагогикалық университетінің ректоры Жанбол Жилбаев пен Ферғана мемлекеттік университетінің (FarDU) ректоры Баходиржон Шермухаммадов өзара ынтымақтастық туралы меморандумға қол қойды.

Бірлескен ынтымақтастық туралы құжат ғылыми өзара іс-қимылды, бірлескен зерттеулерді, ғылыми жұмыстар мен материалдармен алмасуды, сондай-ақ студенттер алмасу бағдарламаларын, қос дипломдық бағдарламаларды дамыту, бірлескен ғылыми конференциялар, семинарлар ұйымдастыру және т.б. қамтиды.

Айта кету керек, Ферғана мемлекеттік университеті Өзбекстандағы жетекші жоғары оқу орындарының бірі болып саналады. Материалдық базасы берік университет ретінде 70 жылдан астам білім беру жүйесінің, халық шаруашылығының әр саласы үшін жоғары білікті мамандарды дайындап, ғылымның іргелі бағыттары бойынша ғылыми-зерттеу жұмыстарын жүргізіп келеді.