ҮЗДІК СТУДЕНТТІК ҰЙЫМДАРҒА «ЖЫЛ ҮЗДІГІ-2022»ПРЕМИЯСЫ ТАБЫСТАЛДЫ

23.12.2022

Әлкей Марғұлан атындағы Павлодар педагогикалық университетінің ең үздік студенттік ұйымдары мен көшбасшы жастарына жыл бойы белсенді жұмыс атқарып, әртүрлі сайыстарда, іс-шараларда оқу орнының атын шығарғаны үшін университет ректорының «Жыл үздігі-2022» премиясы табысталды. Мерекелік кешке университеттің тәрбие және әлеуметтік жұмыстар жөніндегі проректорының міндетін атқарушы Жарқын Қабдолов қатысып, үздіктерді жеңісімен құттықтады.

Сонымен биылғы жылы қандай студенттік ұйымдар белсенділігімен көзге түсіп, «Жыл үздігі-2022» мерекелік кешінің тұғырынан көрінді?

«ЖЫЛ ТАЛАНТТАРЫ-2022» номинациясын «Өнер және спорт жоғары мектебінің студенттерінен құрылған «АМАНАТ» триосы жеңіп алды. Ал «ЖЫЛ ҰЙЫМЫ-2022» сыйлығы университет атын республика деңгейінде шығарып жүрген «АҚИҚАТ» интеллектуалды пікірсайыс клубына берілді. Сонымен қатар, гуманитарлық жоғары мектебінің 3-курс студенті Арнұр Қанатбекұлы «ЖЫЛ КӨШБАСШЫСЫ-2022» премиясының иегері атанды. Жыл үздіктерін университеттің тәрбие және әлеуметтік жұмыстар жөніндегі проректорының міндетін атқарушы Жарқын Қабдолов пен жастар саясаты департаментінің директоры Мадина Құсманова марапаттады. Үздіктер қатарынан табылған ұйымдар мен студенттерге ақшалай сыйлықтар мен арнайы көшбасшылық статуеткалары табысталды.

Павлодар педагогикалық университетінде өздерінің білімі мен талантын бірге көрсетіп, әрбір іс-шараларда белсенділігімен көрініп жүрген студенттер көп. Сондай жастар осы кеште Әлкей Марғұлан атындағы Павлодар педагогикалық университетінің Басқарма төрағасы-ректор Жанбол Жилбаевтың «Алғыс хатын» марапатталады. Одан бөлек студенттік парламент ұйымдар да әртүрлі номинациялар бойынша марапаттарға ие болды. Жастар саясаты департаментінің тәрбие жұмысы бөлімінің басшысы Азамат Жүсіпбаев пен әлеуметтік мәселелер жөніндегі бөлім басшысы Жүсіп Бағдатжан университет жастары үшін әр салада белсенді және жауапты жұмыстар атқарып жүрген студенттерге департаменттің арнайы номинацияларын табыстады.
Көңілді кештің қонақтары университет әншілері Әшір Мадияр, Бәти Досұланның және елімізге белгілі рэпер Аман Тойлаттың өнерін тамашалады.