ҮЗДІК МЕКТЕП ҰСТАЗДАРЫ МАРҒҰЛАН УНИВЕРСИТЕТІНДЕ ДӘРІС ОҚИДЫ

14.02.2023

Бүгін Margulan university ректоры Жанбол Жилбаев пен Павлодар қаласының №2 орта мектебінің директоры Гүлшакер Белгібаева университет студенттерінің педагогикалық тәжірибеден өту мәселелерін талқылады.

Кездесуге ЖОО-ға дейінгі және кәсіптік бағдар беру бөлімінің меңгерушісі Гүлнар Мұсанова, Гуманитарлық ғылымдар жоғары мектебінің деканы Анар Кәрімова, «Тарих» ББ меңгерушісі Бауыржан Әбдірахманов, «Қазақ тілі» ББ-ның меңгерушісі Майгүл Оразханова, мектеп директорының орынбасарлары және ұстаз-тәлімгерлер қатысты.

Университет өкілдері мектеп ұстаздарымен бірлесе отырып, болашақ ұстаздарды даярлауда, студенттер мен мектеп арасындағы байланысты нығайтуда бірлескен ынтымақтастық мәселелерін талқылады.

Директор Гүлшакер Белгібаева мен директордың орынбасарлары ППУ студенттерінің жоғары жауапкершілігі мен белсенділігін атап өтті. Студенттердің кәсіби талаптарға біртұтас көзқарасы болуы үшін педагогикалық қызметтің құқықтық актілерін зерделеуге ерекше көңіл бөлуді ұсынды.

Ректор Жанбол Жилбаев білім ордасының ұстаздарына болашақ мамандардың кәсіби құзыреттілігін қалыптастыруда үлкен рөл атқаратын педагогикалық тәлімгерлікпен айналысқаны үшін алғысын білдірді. «Педагогикалық іс-тәжірибе барысында сіздердің сабақтарыңызды аралау барысында біздің студенттер педагогикалық тәжірибемен танысып қана қоймай, сіздердің көмектеріңізбен өздерінің болашақ кәсіби қызметіне шығармашылық, зерттеушілік көзқарастарын қалыптастырады», - деді Жанбол Октябрьұлы.

Жанбол Жилбаев мектеп әкімшілігі мен тәжірибелі ұстаздарды университетке келіп, заманауи жағдайда мұғалімдерге қойылатын талаптар туралы лекциялар мен семинарлар өткізуге шақырды.

Айта кету керек, №2 орта мектеп «Тарих» ББ негізгі мектебі болып табылады, «Музыкалық білім» ББ-мен меморандум негізінде тығыз байланыста жұмыс істейді. Сонымен қатар, бұл мемлекеттік тілде оқытатын мамандықтар бойынша ЖОО тәжірибесінің негізгі базаларының бірі болып табылады.

Университеттің барлық дерлік ББ мектеппен тығыз байланыста жұмыс істейді, мектеп директорының орынбасарлары университет жанындағы ғылыми кеңестің мүшелері болып табылады. Мектепте оқушыларға «Президенттік тестілеу», жеңіл атлетикадан жарыстар және т.б. тапсыру үшін спорт алаңы қарастырылған.