БІЗДІҢ СТУДЕНТ ТОҒЫЗҚҰМАЛАҚ БОЙЫНША ӘЛЕМ ЧЕМПИОНАТЫНЫҢ КҮМІС МЕДАЛІН ЖЕҢІП АЛДЫ!

26.09.2022

Павлодар педагогикалық университеті өнер және спорт жоғары мектебінің студенті Ерасыл Әутәліпов тоғызқұмалақтан жастар арасында Румынияның Констанца қаласында өткен Әлем кубогының күміс жүлдегері атанды.
Жаттықтырушы Ерлан Айтышевтің айтуынша, жарысқа Қазақстан, Румыния, Эфиопия, Чехия, Түркия, Пәкістан және Болгария сияқты 7 елдің спортшылары қатысты. Ерасыл тоғызқұмалақтан Қазақстан чемпионатында бірінші орын алып, әлем чемпионатына жолдама алыпты.

Айта кетейік, Тоғызқұмалақтан әлем кубогы Қара теңіз жағалауындағы курорттық аймақта өтті. Іс-шара барысында асық атудан, қазақша күрестен, садақ атудан жарыстар, сондай-ақ музыкалық ансамбльдер өнер көрсеткен.
Құрылтайдың басты мақсаты – халық өнерін, қазақтың ұлттық ойындарын дамыту және халықаралық аренада насихаттау, халықтар бірлігі мен достығын нығайту.