БІЗДІҢ СТУДЕН - ШАХМАТТАН ОБЛЫСТЫҚ ЧЕМПИОНАТТЫҢ КҮМІС ЖҮЛДЕГЕРІ

13.11.2023

Жаратылыстану жоғары мектебінің 1 курс студенті Ақмарал Бектас классикалық шахмат бойынша Павлодар облысының чемпионатында екінші орын алды! Ақмаралдың айтуынша, әрбір шахматшыға ойнауға 90 минут + 30 секунд уақыт берілген. Қыздар жеті раундтан өтті. Ақмарал бір ғана қарсыласынан жеңіліп, бір раундты тең ойнап, қалған ойындарының бәрінде жеңіске жетті.

Бұл Ақмаралдың Марғұлан университетінің студенті ретінде шахмат жарыстарына алғаш қатысуы. Ақмарал биыл Ақтоғай ауданы, Қожамжар ауылындағы орта мектепті бітірді. Қазір Марғұлан Университетінің «Математика» БББ "М-11" тобында оқиды.
«Шахмат ойнау менің математикалық дағдыларымды арттырды. Мен тақырыптарды жақсырақ түсіне бастадым. Өйткені, шахмат адамның ақыл-ойын, есте сақтау қабілетін, алғырлығы мен зейінділігін дамытады», - дейді Ақмарал.

Айта кетейік, Ақмаралда көптеген спорттық жетістіктер бар. Көкшетау қаласында өткен «SportFEST Kazakhstan» фестивалінің жеңімпазы, шахматтан облыстық чемпионаттардың бірнеше дүркін жеңімпазы.

Марғұлан Университетінің шахмат бойынша жаттықтырушысы Айдана Жақсыбаеваның айтуынша, шахмат үйірмесіне университеттің барлық жоғары оқу орындарынан 24 студент қатысуда. Оның 5-і ұл, 19-ы қыз. Негізінен «Математика», «Шетел тілі», «Қазақ тілі мен әдебиеті» БББ студенттері қатысады. Қазір шахматшылар командасы желтоқсан айында Өскемен қаласында жоғары оқу орындары арасындағы өтетін жарысқа дайындалуда.