БІЛІМДІ ҰСТАЗ БЕН ДАРЫНДЫ СТУДЕНТ УНИВЕРСИТЕТ АБЫРОЙЫ

08.06.2022

Павлодар педагогикалық университетінің ұжымы үшін 2021-2022 оқу жылы табысты жыл болды. Білікті оқытушылар мен дарынды студенттер талай облыстық, республикалық және халықаралық білім, өнер және спорт додаларында бақ сынап, жетістікке жетті. Бүгін ППУ Басқарма төрағасы-Ректор Жанбол Жилбаев осы оқу жылында жетістікке жеткен оқытушылар мен студенттерді марапаттап, алғысын білдірді.

-Қазіргі уақытта педагогикалық білім беру сапасын арттыру стратегиялық басымдықтардың бірі болып табылады. «Білімді ұлт» сапалы білім беру ұлттық жобасын іске асыру аясында жүйелі негізде жұмыс жүргізіліп келеді. Осыған байланысты білім беру бағдарламаларын акредиттеу, сыртқы сапаны қамтамасыз ету маңызды компоненттердің бірі болып табылады. Құрметті әріптестер, мен акредиттеуге дайындық жұмыстарын жүргізуге қатысқан қызметкерлерге және білім беру бағдарламалары мен жұмыс топтарының басшыларына алғыс білдіргім келеді. Сонымен қатар, алдымызда тағы бір үлкен міндет тұр. Ол университеттің 60 жылдық мерейтойын өткізу. Ағымдағы жылдың қыркүйек және желтоқсан айлары аралығында осы мерейлі датаны абыроймен өткізуіміз керек, - деді Жанбол Октябрьұлы.

2021-2022 оқу жылында мемлекеттік білім беру стандарттарының талаптарына сәйкестігін растау рәсімі аккредитациядан көрсеткен жоғары нәтижелері үшін ППУ Стратегиялық жоспарлау және мониторинг бөлімінің ұжымы ректордың Алғыс хатымен марапатталды. Сонымен қатар, өскелең ұрпақты тәрбиелеп, білім саласының өсіп-өркендеуіне қосқан елеулі үлес қосқан ұстаздар мен БББ жетекшілеріне, XIV республикалық пәндік олимпиадада, спорттық жарыстарда жоғары нәтиже көрсетіп, Университетіміздің намысын абыроймен қорғаған студенттерге де құрмет көрсетіліп, Алғыс хаттар ұсынылды. Шара соңында университет әншісі Абзал Абдоллаев «Көк тудың желбіргені» әнін орындады.