С.БЕЙСЕМБАЕВТІҢ ӨМІРІ МЕН ҚЫЗМЕТІ

18.04.2022

С.Торайғыров атындағы облыстық кітапханада академик Қ.Сәтбаевтің туған күніне және Қазақстанның ғылым саласы қызметкерлері күні мен Павлодар педагогикалық университетінің 60 жылдық мерейтойына орай «Кеңес заманындағы академик С.Бейсембаевтің өмірі мен қызметі» тақырыбында қоғамдық ашық дәріс өтті. Дәрісті ППУ гуманитарлық ғылымдар жоғары мектебінің қауымдастырылған профессоры, тарих ғылымдарының кандидаты Зият Айткенов жүргізді.

Отандық тарих саласында өнімді де нәтижелі зерттеулерімен мол мұра қалдырған С.Бейсембаев кеңестік қоғамның басынан өткізген бел-белестеріне сәйкес ғұмыр кешкен тұлға. Қазіргі заман тұрғысынан қоғамның құндылықтарына деген көзқарас қайта екшеленіп жатқанда С.Бейсембаевтың қызметі мен жеке басы қоғамтанушылардың сынына ұшырамаған аз ғалымдарымыздың бірі. С.Бейсембаев жеке басының мүддесінен ұлттық, халықтың мүддесін жоғары қойды.

Ғалым дәрісте С. Бейсембаев Қазақстан тарихын дамыту жолындағы өнегелі істері бүгінгі ел тізгініндегі тарихшы-ғалымдарға, жалпы азаматтарға жақсы үлгі екендігін баса айтты.

Дәріске Павлодар қаласы Қазтұтыну Одағы колледжінің студенттері мен облыстық ғылыми кітапхана қызметкерлері және оқырмандары қатысты.