БАЛАЛАРҒА АРНАЛҒАН «ART SCHOOL» ЖАЗҒЫ ЛАГЕРІ АЯҚТАЛДЫ

24.06.2022

Павлодар педагогикалық университеті базасында педагогика жоғары мектебінің ұйымдастыруымен ашылған «Art School» жазғы балалар лагері аяқталды. Осыдан екі апта бұрын ашылған жазғы лагерге ППУ қызметкерлерінің балалары қабылданып, бос уақыттарын қызықты да тиімді өткізді. Бүгін сол лагердің жабылу рәсімі салтанатты түрде ұйымдастырылып, барлық балалар Алғыс хаттармен марапатталды. Шараға педагогика жоғары мектебінің деканы Ботагөз Нұрмағамбетова қатысып, балалар мен тәрбиешілерге алғыс білдірді.

- Құрметті бүлдіршіндер, сендерге бұл лагер ұнады деген ойдамын. Алдағы жазғы демалысты көңілді өткізуге тілектеспін. Екі апта бойы осы лагерде сурет салуды, ән айтып, тақпақ жаттауды және әртүрлі қызықты ойыншықтар жасауды үйрендіңдер. Біздің аспазшылар дайындаған дәмді тамағы да ұнады деген ойдамын. Біз бұған дейін өздеріңдей кішкентай баламен жұмыс жасаған жоқпыз. Сондықтан, біздің мұғалімдер үшін де қызықты болды деп ойлаймын. Барлықтарыңа белсенділік танытқандарың үшін алғыс білдіремін, - деді Ботагөз Аманкелдіқызы.

Лагер жетекшісі Арай Рахымжанованың сөзінше, балалар жазғы лагер барысында сурет салуды, тақпақ жаттауды, ән айтуды, би билеуді және бассейнде суда жүзуді үйренген. Сонымен қатар, екі мезгіл тегін тамақ берілді. Осы ретте, лагер ұжымы мен ата-аналар кішкентай бүлдіршіндердің бос уақытын тиімді өткізуіне бар жағдайды жасаған ППУ ректоры Жанбол Жилбаевқа, кәсіподақ ұйымының төрайымы Роза Жаеваға және педагогика жоғары мектебінің деканы Ботагөз Нұрмағамбетоваға алғыс білдірді.