«Ақылдастар алқасымен» кездесу

29.03.2021

ППУ Басқарма төрағасы – ректор Жанбол Жилбаев университеттің «Ақылдастар алқасымен» кездесті. Ақылдастар алқасы – Павлодар педагогикалық университетінің «алтын қазығы» іспеттес. Университет қабырғасында көп жылдар қызмет істеп, білімі мен білігін жас ұрпаққа дарытып, тәжірибесімен бөлісіп отыратын «Ақылдастар алқасының» орны ерекше.

Қазіргі эпидемоолгиялық жағдайға байланысты «Ақылдастар алқасымен» кездесудің сәті енді түскен еді. Оларды жылы жүзбен қарсы алған университет басшысы кездесуде көп мәселені ортаға салды.

«Университетіміздің дамуы жолында біздің алдымызда үлкен мақсат-міндеттер тұр. Ол үздіксіз педагогикалық білім берумен қатар, оқу ордамыздың стратегиялық дамуы бағытында біріге жиі жұмыс істейміз деген ойдамын. Осы орайда сіздердің тәжірибелеріңіз бен ақыл-парасаттарыңыз жастарға ауадай қажет» - деді университет ректоры Жанбол Жилбаев. 

«Ақылдастар алқасы» отырысында университеттің Ғылыми кеңес құрамына  бір адам таңдалып алынып, ол «Ақылдастар алқасына» төрағалық ететін болады. Кеңес мүшелерінің шешімімен бірауыздан б.ғ.д, профессор Базарбеков Қ.У. тағайындалды.

Келесі жылы Павлодар педагогикалық университетіне 60 жыл толмақ. Соған байланысты Кеңес мүшелері университеттің мерейтойына дайындық жұмыстарын жүргізу, шешімін күтіп жүрген көптеген жайттарды талқылап, оқу процесін жетілдіруге қатысты сұрақтар мен ғылыми-зерттеу жұмыстарын дамыту, болашақ педагогтерді тәрбиелеу және салауатты өмір салтын ұстану сияқты бірқатар мәселелерді ортаға салды.

Университет басшысы өткізген келелі кездесу өз мақсатына жетіп, ұстаздар ордасының көркеюіне өз үлестерін қосып жүрген қазыналы қарияларға зор денсаулық тілеп, әрдайым қатарда жүруіне тілек білдірді.