ӘСЕТ БЕЙСЕКИНДІ ЕСКЕ АЛУҒА АРНАЛҒАН ТУРНИР

16.01.2023

Өткен демалыс күндері Әлкей Марғұлан атындағы Павлодар педагогикалық университетінің базасында жаттықтырушы, Қазақстан Республикасының спорт шебері Әсет Бейсекинді еске алуға арналған еркін күрестен ХХ аймақаралық турнир өтті.

Жарысқа Алматы, Астана, Ақмола, Солтүстік Қазақстан, Жетісу, Абай және Павлодар облыстарынан 200-ден астам жас спортшы қатысты. 2008-2010 жылы туған 7-9 сынып оқушылары 13 салмақ дәрежесі бойынша сынға түсті.

Байқауға қатысқан жас спортшылардың бірі – Ақсу қаласынан келген 8-сынып оқушысы, 13 жасар Алан Мусалин. Ол мұндай ірі турнирге алғаш рет қатысса да, 32 келі салмақ дәрежесінде жеңімпаз атанды.

-Маған бұл жарыстарға қатысу өте ұнады. Осындай жақсы жабдықталған үлкен спорт залында мықты қарсыластармен жекпе-жек өткізу өте қызықты. Ең бастысы, мұнда өте жақсы жаттықтырушылар бар. Менің арманым – осы университетке түсіп, осында білім алған чемпиондар сияқты Қазақстанның даңқын әлемдік спорт аренасында асқақтату, – дейді Алан.

Өнер және спорт жоғары мектебінің оқытушысы Жанар Усинаның айтуынша, жарыстар дарынды ұстаз Әсет Бейсекиннің есімін мәңгі есте сақтау, еркін күресті кеңінен насихаттау, оқушылар арасында кәсіптік бағдар берудің тиімділігін арттыру мақсатында өткізіліп отыр. «Біздің міндетіміз – шалғай ауылдардан келген жас спортшыларға үлкен спорттың не екенін өз көздерімен көруге мүмкіндік беру, мектеп оқушыларын қабырғасында көптеген қазақстандық спорт жұлдыздары оқып, шыңдалған университетпен таныстыру», - деді Жанар Амангелдіқызы.

Жарыстар өте әсерлі өтті. Айта кету керек, әрбір жас спортшы ерік-жігерін, табандылығын және жеңіске деген құштарлығын көрсетті. Қызықты жекпе-жектердің нәтижесінде Павлодар педагогикалық университетінің командасы жақсы жетістіктерге қол жеткізді.

Іс-шара соңында Павлодар облысы бойынша Біріккен күрес федерациясының төрағасы Байсов Ілияс Қапсаматұлы жарысқа жоғары деңгейде дайындалған ұйымдастырушыларға алғысын білдірді. Турнирдің барлық жеңімпаздары мен жүлдегерлері Павлодар облысының дене шынықтыру және спорт басқармасының медальдарымен және грамоталарымен марапатталды.