АРДАГЕР ҰСТАЗ АЛЛА ЧЕРЕПАНОВА-АЛПЕРОВИЧПЕН ШЫҒАРМАШЫЛЫҚ КЕЗДЕСУ

29.04.2022

Е.Бекмаханов атындағы ғылыми кітапханада Қазақстан Республикасы білім беру ісінің құрметті қызметкері, Қазақстан және КСРО білім беру ісінің үздігі, биология пәнінің педагог-әдіскері Алла Леонидовна Черепанова-Альперовичпен кездесу болды.
Іс-шараға ППУ тәрбие және әлеуметтік мәселелер жөніндегі проректоры Болат Құдайбергенұлы, Е.Бекмаханов атындағы ғылыми кітапхананың директоры Роза Игібаева қатысып, ұстазға алғыс білдіріп, сый-жоралғысын жасады.

- Биыл университеттің 60 жылдығына орай әртүрлі кездесулер өткізілуде. Алла Леонидовна – университетіміздің алғашқы түлектерінің бірі. Бұл кісі нағыз сегіз қырлы жан. Жасы келсе де, үнемі ізденіс үстінде жүреді. Кітап жазып, білімі мен тәжірибесін жас ұрпақпен бөлісуде. Университет ұжымы атынан Алла Леонидовнаны биылғы мерейтойымен құттықтап, зор денсаулық, табыс тілеймін, - деді Роза Ержанқызы.

Алла Леонидовна биыл мерейлі 60 жасқа толды. Ол барлық саналы өмірін педагогикалық қызметке арнаған жан. 1968 жылы осы оқу орнын тәмамдаған алғашқы түлектердің бірі. Еңбек жолын Павлодар облысы Ақсу ауданы Жамбыл орта мектебінде бастап, сол мектепте 27 жыл жұмыс істеді. Оның 20 жылында "Халықаралық достықтың биологиялық мұражайы" мен LOTOS bio-KID үйірмесінің ұйымдастырушысы және жетекшісі болды. 1995 жылы ПМПИ-ге оқытушысы болып келіп, Адам анатомиясы және физиологиясы кафедрасында «Адам өмірінің қауіпсіздігі» пәнінен сабақ берді. Оның «Темекі шегу немесе денсаулық-өзіңіз таңдаңыз! » атты әдістемелік жұмысы «Адам өмірінің қауіпсіздігі» журналында жарияланған.  Сондай-ақ Мәскеу қаласында өткен байқауда 1 орын алды. 2005 жылы Павлодар мемлекеттік педагогикалық институтының колледжінде валеология, биология, экология және анатомияда пәндерінен сабақ берді.

50 жыл бойы педагогикалық қызметінде Алла Леонидовна түрлі халықаралық және республикалық конференцияларға қатысып, оқушылармен және студенттермен белсенді және жемісті жұмыс жүргізді.
Ұлағатты ұстаз 20-дан астам ғылыми еңбектің, 6 оқулықтың авторы.

Кездесуге ППУ және М.Қанапиянов атындағы жоғары колледж студенттері қатысты. Шара барысында Алла Леонидовнаның өмірі мен қызметі туралы слайд-презентация ұсынылды. Сондай-ақ, «Ұстаздың өмір жолы» атты кітап көрмесі ұйымдастырылды.