ӘЛКЕЙ МАРҒҰЛАННЫҢ «ОЛЖАБАЙ БАТЫР» КІТАБЫ ЖАРЫҚ КӨРДІ

17.04.2023

Белгілі әдебиеттанушы, өнертанушы, шығыстанушы, Ұлттық археология мектебінің негізін қалаушы, этнограф, академик Әлкей Хақанұлы Марғұланның «Олжабай батыр» кітабы жарық көрді. Кітаптың тұсаукесер рәсімі Торайғыров университетінде өтті.

Жиынға ғалымның ұрпағы, Марғұлан атындағы халықаралық қордың вице-президенті Данель Марғұлан, Павлодар облысы әкімінің орынбасары Айзада Құрманова, ҚР Сенатының депутаты, профессор Алтынбек Нухұлы, өңірдегі жоғарғы оқу орындарының басшылары, белгілі ғалымдар мен ақын-жазушылар қатысты.

Кітапқа Әлкей Марғұланның Олжабай батыр туралы зерттеулері мен мақалалары жинақталған. Аталмыш кітаптың ерекшелігі – ғалымның отбасылық және жеке қорында сақталған бірегей еңбектері енгізілген. Шараның құрметті қонағы Данель Әлкейқызы үйінде әкесінің Олжабай батыр туралы жазған қолжазбалары көп екенін атап өтті.

- Кішкентай қағаздар, үлкен дәптерлер, араб жазуымен жазылған да қағаздар көп. Жинап-жинап, не істеу керек деп ұзақ ойлап жүрдім. Олжабай батырдың ерлігін жас балаларға айту керек, насихаттау қажет. Сол арқылы жастардың ұлттық намысын көтеріп жүру керек, - деді Данель Марғұлан.

Аталған кітап «Олжабай батыр» қорының демеушілігімен шықты. Ал кітапты ғылыми тұрғыда зерттеп, баспаға дайындаған жауапты редакторы – Р.Б. Сүлейменов атындағы Шығыстану институтының аға ғылыми қызметкері, PhD докторанты, Қазақстан Жазушылар одағының мүшесі Бағдат Дүйсенов.