МАРҒҰЛАН УНИВЕРСИТЕТІНІҢ АКРОБАТТАРЫ ҚР КУБОГЫНЫҢ ЖЕҢІМПАЗЫ БОЛДЫ

21.09.2023

Петропавл қаласында спорттық акробатикадан жастар және жасөспірімдер арасында Қазақстан Республикасының Кубогы аяқталды. Оған еліміздің 8 қаласынан 150 спортшы қатысты. Жарыс ҚР Мәдениет және спорт министрлігінің Спорт және дене шынықтыру істері комитетінің ұйымдастыруымен өтті.

Онда Марғұлан университеті өнер және спорт жоғары мектебінің ДШжС-22 тобының студенті Аяжан Ещанова Павлодар облысы құрама командасының қатарында өнер көрсетті. Құрамада Адина Марат және Яна Рауш секілді акробаттар бар.

Қатысушылардың айтуынша, жарыстың қорытынды нәтижесі екі негізгі акробатикалық жаттығулардан тұрды: Тепе-теңдік (статика, тұрақтылық, тепе-теңдік, қозғалыстарды бекіту) және секіру (лақтыру, айналу, сальто), сонымен қатар бағдарламаның біріктірілген бөлігі (баланс пен вольтиж).

Еліміздегі ең мықты спортшы қыздардың арасында біздің гимнастшылар ең күрделі акробатикалық элементтер мен таң қалдыратын трюктерді тамаша орындап, ең жоғары шеберліктерін көрсетті. Байқау қорытындысы бойынша олар бірінші орынды жеңіп алды!

Қыздарды спорттық акробатикадан еңбек сіңірген жаттықтырушы Татьяна Михайловна Коваленко жаттықтырады, ол көптеген халықаралық жарыстардың жүлдегерлерін дайындады.