Абай ескерткішіне гүл шоқтары қойылды

10.08.2021

10 тамыз – хакім Абайдың туған күні. Биыл Ұлы ақынның дүниеге келгеніне – 176 жыл. Осыған орай, бүгін Абай ескерткішінің алдында гүл шоқтары қойылды. Рәсімге Павлодар педагогикалық университетінің басқарма төрағасы – ректоры Жанбол Жилбаев қатысты.

Мемлекет басшысы Қасым-Жомарт Тоқаевтың тапсырмасы бойынша 2020 жылдан Абай күні белгіленіп, еліміздің атаулы мерекелік даталар тізбесіне енгізілген болатын. Басты мақсат – Абайды ұлтымыздың рухани реформаторы, әлемдік деңгейдегі кемеңгер ретінде оның теңдессіз шығармашылығын насихаттау болып табылады.

Айта кетсек, былтыр Абайдың 175 жылдық мерейтойы қарсаңында артында өшпес мұра қалдырған ойшылды өскелең ұрпаққа кеңінен дәріптеу мақсатында орталық алаңда Абай ескерткіші орнатылған болатын. Ақынның мүсіні – қоладан құйылып, тұғыры граниттен жасалған. Ескерткіш биіктігі – 5,25 метр. Авторы – Қазақстан Суретшілер одағының мүшесі, мүсінші Асқар Нартов. Тұғырда «Адамзаттың бәрін сүй, бауырым деп...» деген жазу бар.