«ABAI TV» ТЕЛЕАРНАСЫНА СҰХБАТ БЕРДІ

17.12.2020

ПМПУ Гуманитарлық ғылымдар жоғары мектебінің профессоры, филология ғылымдарының докторы Сейфитден Сүтжанов «Abai tv» мәдени-ағарту телеарнасына ақын Мәшһүр Жүсіп Көпейұлының өмірі мен шығармашылығы туралы «Дәуір даналары» бағдарламасында сұхбат берді.

Өз сөзінде С.Сүтжанов Мәшһүр Жүсіптің еңбектеріне тоқталып, ақынның күрделі әлеуметтік мәселелерді көтергендігі туралы, сол кездегі патша өкіметінің отарлау саясатына халықтың наразылығы, 1905 жылғы патша манифесі, сол жылғы оқиғалардың ақын еңбектеріндегі көрініс табуы туралы баяндады. Сондай-ақ М.Ж. Көпейұлының қазақ фольклор нұсқаларын жинау ісімен шұғылданғаны, жалпы ақын еңбектеріне алаш қайраткерлерінің көзқарасы туралы әңгіме сөз болды.  

Бағдарлама аясында ақын өмірбаянын жіті зерттеген мәшһүртанушы ғалымдар: ақын, драматург, жазушы, әдебиет пен өнер зерттеушісі Баянғали Әлімжанов, филология ғылымдарының докторы, профессор, академик, Мәшһүр Жүсіп Көпейұлы ғылыми-практикалық орталығының директоры Айтмұхамбет Тұрышев, Мәшһүр Жүсіптің шөбересі – филология ғылымдарының докторы, профессор Нартай Жүсіп, филология ғылымдарының кандидаты, ақын Серік Елікбаев Мәшһүр шығармашылығының рухани мұрасын саралап, жаңаша көзқарастарын білдірді.

                                                                                                                 Қасымхан Мұхитов, ППУ Баспасөз қызметі