Ақан Алпысовтың мерейтойына арналған "Ұстаздық еткен жалықпас" атты дөңгелек үстел

10.11.2021

Павлодар педагогикалық университетінде Жаратылыстану жоғары мектебінің профессоры, педагогика ғылымдарының кандидаты, доцент Ақан Алпысовтың 60 жылдығына арналған "Ұстаздық еткен жалықпас" атты дөңгелек үстел өтті.

Іс-шараға мемлекеттік органдардың, ғылыми және шығармашылық, зиялы қауым өкілдері, Павлодар Ертіс өңірінің жоғары оқу орындарының оқытушылары мен студенттері қатысты.

Университеттің бас ғимаратының фойесінде ғалымның еңбектерінің көрмесі ұйымдастырылды. Ақан Алпысов – ғылыми және әдістемелік мазмұндағы 110-нан астам мақаланың, оның ішінде 2 монография, 19 оқу-әдістемелік құралдың, 6 мақала шетелдік журналдарда және 4 авторлық куәліктің авторы.

Павлодар педагогикалық университетінің профессоры, Қазақстан Республикасының Білім беру ісінің құрметті қызметкері Бақтияр Наймановтың айтуынша, Ақан Алпысов - нағыз кәсіби маман, өз мамандығын жан-тәнімен сүйетін, болашақ педагогтармен білімімен бөлісуден шаршамайтын ұстаз.

Іс-шарада басқа университеттердегі әріптестердің құттықтау хаттары, ғалымның қонақтары, достары мен оқушыларының баяндамалары тыңдалды. Кездесуге қатысушылар педагог, тәлімгер, пікірлес және ғалым Ақан Алпысовқа жылы лебіздерін білдірді.

Кездесу қатысушыларына ғұмырын ұрпақ тәрбиесіне арнаған ғалым-ұстазға арналған бейнефильм көрсетілді.