ПАВЛОДАРДА ЖОҒАРЫ ОҚУ ОРЫНДАРЫ АРАСЫНДА ҮСТЕЛ ТЕННИСІНЕН РЕСПУБЛИКАЛЫҚ ТУРНИР БАСТАЛДЫ

26.02.2024

Бүгін Әлкей Марғұлан атындағы Павлодар педагогикалық университетінің ұйымдастыруымен еліміздегі ЖОО студенттері арасында республикалық үстел теннисі турнирі басталды. Байрақты бәсеке көрнекті ғалым, академик Әлкей Хақанұлы Марғұланның 120 жылдығына орай ұйымдастырылуда. Турнирдің ашылу салтанатына Марғұлан университеті стратегиялық даму және әлеуметтік жұмыс жөніндегі проректоры Серік Ильясов қатысып, спортшыларға сәттілік тіледі. Сондай-ақ,

Жарысқа Л.Гумилев атындағы Еуразия ұлттық университетінің, Шәкәрім атындағы Семей университетінің және Марғұлан университетінің спортшылары қатысып, бақ сынап жатыр. М.Қанапиянов атындағы жоғары колледжінің жаттықтырушысы Дәулет Әбішевтің сөзінше, жарыс екі күнге жалғасады. Бірінші күні командалар бір-бірімен бәсекеге түссе, екінші күні жеке ойыншылар өзара мықтыларды анықтайды.

Үлкен жарысқа өзге өңірлерден келген қонақтардың бірі – Қырмызы Сүйінбек. Ол Астана қаласындағы Л.Гумилев атындағы Еуразия ұлттық университеті атынан келген.

- Біз Астанадан алты студент бір команда болып келдік. Өзіміз білім алып жатқан Еуразия ұлттық университетінің намысы үшін барымызды салып ойнайтын боламыз. Осындай үлкен жарыс өткізіп жатқан Марғұлан университетінің ұжымына, басшылығына алғыс білдіремін. Барша қатысушыларға, қарсылас командаларға сәттілік тілеймін, - деді Қырмызы Сүйінбек.