ОЛЖАС СҮЛЕЙМЕНОВ – ӘЛЕМДІК ТҰЛҒА

18.05.2022

Бүгін Қазақстанның Халық Жазушысы, Мемлекет және Қоғам қайраткері, ақын Олжас Сүлейменовтің туған күні. Жерлесіміз биыл 86 жасқа толып отыр.

Олжас Омарұлының есімін Ертіс-Баян жұртшылығы, соның ішінде Павлодар педагогикалық университеті ұжымы ерекше құрмет тұтады. Себебі, ақынды университетпен байланыстыратын дүние көп. Сондықтан болар, Олжас Сүлейменов Павлодар өңіріне келген сайын ұстаздар ордасына ат басын бұрмай кетпейді. Бүгінде Павлодар педагогикалық университетінде Олжас Сүлейменовтың атында шығармашылық орталық бар. Онда ақынның шығармашылығына арналған әдеби кештер жиі ұйымдастырылады. Сондай-ақ, әрбір мерей тойы да жоғары деңгейде аталып өтіліп келеді. 2019 жылы «Рухани жаңғыру» бағдарламасы аясында Павлодар педагогикалық университеті «Ертіс-Баян өңірінің 100 тарихи тұлғалары» қысқаметражды фильмдер сериясын жарыққа шығарған еді. Сол фильмдердің 50-ші сериясы Олжас Сүлейменовке арналған. Осыдан бірнеше жыл бұрын үздік студенттерге Олжас Сүлейменов атындағы шәкіртақы тағайындалған.

Бүгін Е.Бекмаханов атындағы ғылыми кітапхананың №5 оқу залында ақынның туған күніне арналған шығармашылық кеш өтті. Оған М.Қанапиянов атындағы жоғары колледж студенттері қатысып, ақынның шығармаларынан өлең оқыды. Сонымен қатар, филология ғылымдарының кандидаты, профессор Гүлнәр Мұхамбетова Олжас Сүлейменовтің өмір жолы мен шығармашылығы, әлемдік және мемлекеттік деңгейде атқарған істері туралы дәріс оқыды. Сонымен қатар, шағын кітап көрмесі ұйымдастырылып, оған ақынның кітаптары, шығармашылығы туралы зерттеу мақалалар, «Неведа-Семей» қозғалысы туралы еңбектер қойылды.

Көрнекті ақын жерлесіміз Сүлейменов Олжас Омарұлын бүгінгі туған күнімен құттықтай отырып, зор денсаулық, ұзақ ғұмыр тілейміз.