МАРҒҰЛАН УНИВЕРСИТЕТІ ЕКІБАСТҰЗ ҚАЛАСЫНЫҢ БІЛІМ БЕРУ БӨЛІМІМЕН БІРЛЕСІП «PARASAT» ЗИЯТКЕРЛІК МЕКТЕБІН АШТЫ

27.02.2024

Бүгін Әлкей Марғұлан атындағы Павлодар педагогикалық университетінің басқарма төрағасы-ректор Жанбол Жилбаев бастаған университет делегациясы Екібастұз қаласына барып, «Қайнар» білім беру орталығында қалалық білім беру бөлімінің және жергілікті мектеп басшыларымен кездесті. Марғұлан университетінің Екібастұз қаласындағы күні «PARASAT» зияткерлік мектебін ашу жөнінде меморандумға қол қою рәсімімен басталды. Білім беру саласын дамытуға, сапалы педагог кадрларын даярлау жұмысын бірлесіп жүргізуге бағытталған маңызды құжатқа Марғұлан университетінің ректоры Жанбол Жилбаев пен қалалық білім бер беру бөлімінің басшысы Лаура Дисюпова қол қойды.

Сонымен қатар, университет оқытушылары №36 мектеп-лицейінде қала мектептерінің оқушыларына ҰБТ-ға дайындық жөнінде сабақ өткізді.

- Өңіріміздегі жалғыз педагогикалық жоғары оқу орыны, тарихы терең ұстаздар ордасы-Марғұлан университетімен серіктес болу біз үшін үлкен мәртебе.
Себебі жас ұрпақты тәрбиелеп, оларға сапалы білім беретін ұстаздарды сіздер даярлайсыздар. Ал біздің қызметіміздің басты мақсаты- Тәуелсіз еліміздің жарқын болашағы болып табылатын жастарды тәрбиелеу. Ол үшін ұстаздарымыз білімді, білікті әрі өз елінің патриоты болуы қажет. Осы жолда сіздермен бірлесіп жұмыс жүргізіп, қаламыздың білім беру саласын көтереміз деп үміттенеміз. Сіздерге жемісті еңбек, шабытты шығармашылық және толағай табыс тілеймін,-деді Лаура Аманқызы.
Университет басшысы Жанбол Жилбаев оқу орынның ғылыми және академиялық бағытта атқарып жатқан жұмыстары мен жетістіктері туралы ақпарат берді.

-Биыл біз үшін ерекше жыл, себебі академик Әлкей Хақанұлы Марғұланның туғанына 120 жыл толды. Былтыр оқу ғимаратының алдына академиктің ескерткіш мүсінін орнаттық, оған Дәнел Әлкейқызы өзі келіп қатысты. Бүгінгі күні біздің әріптестеріміз заман ағымына сай жұмыс істеп келеді. 2015-2016 жылдары жаңарту реформасы басталғанда біз Назарбаев зияткерлік мектебінің тәжірибесін енгіздік. 2018-2019 жылдары Назарбаев университетінің тәжірибесін қабылдадық. Бүгінде орта мектептермен де әріптестік байланыс нығайған. Бұған дейін Павлодар қаласында үш мектепте, Майқайыңда бір мектепте, Железин ауданында бір мектепте педагогикалық сыныптарын аштық. Дегенмен онымен ғана тоқтамаймыз. Бүгін Екібастұз қаласына келіп, ынтымақтастық туралы шартқа қол қойдық. Жалпы қала мен ауыл мектептерінің арасында алшақтық бары құпия емес, сондықтан бүгінгі мақсатымыз- сол мәселені шешу,-деді Жанбол Октябрьұлы.